Ազգային ժողովի նախագահ Ալեն Սիմոնյանը քննադատել է ԱԺ ընդդիմադիր «Հայաստան» և «Պատիվ ունեմ» խմբակցություններին:
«Ի՞նչին եք դուք մասնակցում, ի՞նչ պիտի լինի, որ այս դահլիճում ձեր օրակարգը սպասարկվի։ Հայաստանը գրավե՞ն վերջնականապես, բոլորս մեռնենք, ի՞նչ պիտի լինի, որ դուք գաք դահլիճ, ո՞րն է ձեր օրակարգը կամ դուք խի՞ եք եկել, ուզում եմ դա էլ հասկանալ»,- ընդդիմադիր պատգամավորներին դիմեց ԱԺ նախագահ Ալեն Սիմոնյանը։
ԱԺ նախագահի խոսքով՝ վարչապետ Նիկոլ Փաշինյանը եկել էր ԱԺ, խոսում էր հայ-ադրբեջանական սահմանին մարտական գործողությունների մասին, զոհերի, վիրավորների մասին, իսկ ընդդիմությունը ասում է «Մենք մեր օրակարգը ունենք»:
«Ադրբեջանի մասին հայտարարություն ենք ընդունում, երրորդ կետով ներքաղաքական հարց եք լուծում, ասում եք՝ այսպես կոչված, խաղաղության դարաշրջանի քաղաքական սնանկությունը։ Ո՞ւմ է դա հետաքրքիր, հիմա դրա մասի՞ն ենք խոսում, ձեր սնանկության մասին 30 տասնամյակ կարելի է խոսել։ Չորրորդ կետով էլ ասում եք՝ Ադրբեջանի հետ բանակցություններից դուրս գանք։ Լո՞ւրջ, դուրս գանք, բա ի՞նչ անենք, որ դուրս գանք, էլի երկու հոգով գնաք սահման պահե՞ք։ Մի եկեք էլի դահլիճ, որ գալիս եք, ո՞ւմ է պետք։ Նույնիսկ այս իրավիճակում դուք չեք կարողանում ՀՀ շահը սպասարկել»,- հայտարարեց Ալեն Սիմոնյանը։
