Փետրվարի 6-ին, տեղական ժամանակով ժամը՝ 14:24-ին (Գրինվիչի ժամանակով ժամը՝ 10:24-ին) ՀՀ ԱԻՆ Սեյսմիկ պաշտպանության տարածքային ծառայության սեյսմոլոգիական ցանցի կողմից գրանցվել է հյուսիսային լայնության 38.05⁰ և արևելյան երկայնության 37.25⁰ աշխարհագրական կոորդինատներով՝ Թուրքիա՝ Քահրամանմարաշ քաղաքից 60 կմ հյուսիս-արևելք, օջախի 10 կմ խորությամբ, 7․7 մագնիտուդով երկրաշարժ:
Էպիկենտրոնային գոտում ստորգետնյա ցնցման ուժգնությունը կազմել է 10-11 բալ:
Երկրաշարժը զգացվել է Երևան քաղաքում 3 բալ, Շիրակի մարզի Գյումրի քաղաքում` 3-4 բալ ուժգնությամբ։
Նոր ցնցումների հետևանքով զոհերի և ավերածությունների մասին դեռևս ոչ մի տեղեկություն չի հաղորդվում:
Փետրվարի լույս 6-ի գիշերը գրանցված ուժգին երկրաշարժի հետևանքով վերջին տվյալներով զոհվել է 912 մարդ, վիրավորվել 5385 մարդ:
Թուրքիայի նախագահ Ռեջեփ Թայիփ Էրդողանը ճեպազրույցում հայտնել է, որ վիրավորների թիվը 5385 է։
Էրդողանը հավելել է, որ փլատակների տակից 2470 մարդ է դուրս բերվել։ Ընդհանուր առմամբ երկրաշարժի հետևանքով ավերվել է 2818 շինություն։
