Ռուսաստանի նախագահ Վլադիմիր Պուտինը կառավարությանը հանձնարարել է շտապ 10 հազար ռուբլի վճարել Դոնբասից Ռոստովի մարզ ժամանող յուրաքանչյուր փախստականի, ասել է Կրեմլի խոսնակ Դմիտրի Պեսկովը։
Նախարարների կաբինետի մամուլի ծառայությունը հաստատել է, որ կառավարությունը Պուտինի անունից «միանվագ վճարում է ԿԺԴՀ-ի և ԼԺՀ-ի փախստականներին՝ 10 հազար ռուբլու չափով», պարզաբանելով, որ վճարումները կկատարվեն պահուստային ֆոնդից։
Պեսկովը նաև հայտնել է, որ Ռոստովի մարզի նահանգապետ Վասիլի Գոլուբևը Պուտինին խնդրել է շտապ դաշնային օգնություն տրամադրել տարածաշրջանին՝ կապված Դոնբասից փախստականների չնախատեսված հոսքի հետ։
Հիշեցնենք, որ ավելի վաղ Դոնեցկի և Լուգանսկի ինքնահռչակ հանրապետությունների ղեկավարները հայտարարել էին զանգվածային տարհանման մասին: Մասնավորապես, ինքնահռչակ Դոնեցկի Ժողովրդական Հանրապետության ղեկավար Դենիս Պուշիլինը հայտարարել էր ՌԴ ղեկավարության հետ Ռոստովի մարզում քաղաքացիներին տեղավորելու պայմանավորվածության մասին:
Ինքնահռչակ Լուգանսկի Ժողովրդական Հանրապետության ղեկավար Լեոնիդ Պասեչնիկը նույնպես բնակիչներին կոչ էր արել մեկնել ՌԴ: