Ի՞նչ ես զարմացած դու նայում, մի՞թե երջանիկ չես տեսել, զարմացել ես: Օրերս «Platform» նորաբաց համերգասրահում վերոնշյալ բառերով երգն էր կատարում “Reincarnation” ռեգգի խումբը: Չգիտենք` հյուրերի քանի տոկոսն էր երջանիկ, բայց երեկոյի կազմակերպիչների նպատակը ներկաներին լավ երաժշտություն ու դրական տրամադրություն փոխանցելն էր:
«Մի գդալ սեր», «Յար, արի», «Աղուհաց», «Լուսաբաց», «Սեր», «Հոգուն», «Ավելի լավա», «Քեզ պիտի սիրեմ» ու բազմաթիվ այլ գործերով հայտնի «Ռեինկարնացիա» խմբի կատարումները ներկաներն ունկնդրում էին հոտնկայս:
Երեկոյի ամենասկզբում դիջեյական վահանակի մոտ էր Dj Serjo-ն: Իսկ արդեն համերգի առաջին մասում հնչում էին խմբի մեղեդային երգերը, իսկ ընդմիջումից հետո բեմահարթակի մոտ մարդկանց թիվն ավելանում էր, ռիթմիկ երգերը ստիպում էին պարել ու ձայնակցել:
«Ռեինկարնացիա»-ի հիմնադիր-վոկալիստ Ռոլանդ Գասպարյանի փոխանցմամբ երկրորդ մասում հնչում էին այն երգերը, որոնք հայտնի են հեռուստաէկրաններից․ «Դուք շատ լավն եք, գիտե՞ք, որ այդքան լավն եք», – նշում էր նա բեմից:
Իսկ «Էլի լավա» ու «Աշխարհումս իմն դուն իս» երգերի ժամանակ դահլիճում միանգամից ակտիվություն նկատվեց. ակնհայտ է, որ այդ երգերը հանդիսատեսի կողմից ամենասիրվածն են:
2001 թվականին՝ ուղիղ 20 տարի առաջ ձևավորված հայկական երաժշտական խումբը հասցրել է փոխել տարբեր ոճեր՝ հարդ ռոքից անցնելով ռեգգիի: Նվագախումբն ունեցել է բազմաթիվ համերգներ ինչպես Հայաստանի տարբեր մարզերում, այնպես էլ Ռուսաստանում, Լեհաստանում, Ավստրիայում, Գերմանիայում, Ֆրանսիայում, ԱՄՆ-ում և շատ այլ երկրներում:
