Ազգային ժողով-կառավարություն հարց ու պատասխանի ժամանակ արտաքին գործերի նախարար Արարատ Միրզոյանն անդրադարձավ հարցին, թե ինչ քայլեր է անում ԱԳՆ-ն Արցախում գազամատակարարման խնդրի լուծման ուղղությամբ։ Ըստ Արարատ Միրզոյանի Արցախում գազամատակարարման խափանման հարցը Հայաստանը դիվանագիտական խողովակներով ներկայացրել է միջազգային գործընկերներին: Բացի այդ ըստ նախարարի խոսքով հարցը քննարկվում է ռուս գործընկերների հետ, քանի որ գազատարի խնդրահարույց հատվածը գտնվում է ռուս խաղաղապահների պատասխանատվության գոտում:
«Ինչպես առաջին անգամ գազամատակարարման խափանման դեպքում, այնպես էլ երկրորդ անգամ մենք անմիջապես գործի ենք դրել մեր բոլոր դիվանագիտական հնարավոր ջանքերը։ Նախ և առաջ մենք սերտ կապի մեջ ենք ռուսաստանցի գործընկերների հետ, որովհետև գիտեք, որ վթարը, այս դեպքում արդեն վթար չէ, վնասված կամ վթարված տեղանքը գտնվում է խաղաղապահների պատասխանատվության գոտում։ Բայց նաև ողջ մնացյալ քաղաքակիրթ աշխարհի հետ է մեր կապը։ Երեկ ԱԳՆ-ն հայտարարություն է տարածել, բացի դրանից, տեղի ունեցածի մասին նոտա է հղվել մեր բոլոր միջազգային գործընկերներին։ Եվ արձագանքներն արդեն ստացվում են։ Նախորդ անգամ վարչապետը խոսել է և ԱՄՆ պետքարտուղարի հետ, և ՌԴ նախագահի հետ, և Ֆրանսիայի նախագահի հետ, և նաև արտգործնախարարությունը՝ իրեն հասանելի խողավակներով։ Նույնը և այս անգամ է, արդեն արձագանքները տեսում ենք, ցավոք սրտի, տեղում հարցը դեռ լուծված չէ»,- ասաց Արարատ Միրզոյանը։
