ԱՄՆ պետքարտուղար Էնթոնի Բլինկենը շարունակում է հավատալ, որ Հայաստանի և Ադրբեջանի միջև խաղաղությունը հասանելի է, և նա դա Մյունխենում քննարկել է երկու երկրի ղեկավարների հետ։
Այս մասին ճեպազրույցի ժամանակ ասել է Պետքարտուղարության խոսնակ Մեթյու Միլլերը:
«Նա երկրների ղեկավարներին խրախուսել է միասին աշխատել՝ լուծելու ի վերջո մնացած ընդամենը մի քանի հարցերը: Եվ մենք կշարունակենք խրախուսել այդ երկրներին հասնել խաղաղության համաձայնագրի։ Երկու առաջնորդները երկկողմ հանդիպում են ունեցել Մյունխենում, և մենք կշարունակենք առաջարկել Միացյալ Նահանգների աջակցությունն ու օգնությունը համաձայնության հասնելու համար»,- նշել է նա։
Հարցին՝ արդյոք նա դեռ հավատում է, որ խաղաղությունը հասանելի է, Միլլերը դրական պատասխան է տվել։
«Նա դեռ հավատում է, որ խաղաղությունը հասանելի է, և նա դա ուղղակի քննարկել է այս երկու երկրների ղեկավարների հետ և խրախուսել նրանց միասին աշխատել՝ հաղթահարելու մնացած մի քանի մարտահրավերները: Եվ մենք շարունակելու ենք խրախուսել այդ երկրներին, որ հասնեն խաղաղության համաձայնագրի։ Ես գիտեմ, որ երկու առաջնորդները երկկողմ հանդիպում են ունեցել Մյունխենում, ուստի մենք կշարունակենք առաջարկել Միացյալ Նահանգների օգնությունն ու աջակցությունը՝ համաձայնության հասնելու հարցում»,– ասել է նա: