Ֆեյսբուքում հայ մարդիկ հրճվում են, որ Իսրայելի դատաստանի օրն է, վերլուծաբանները գրում են իսրայելական հետախուզության ձախողման, բանակի անպատրաստության եւ այլնի մասին: Այս մասին գրում է Արցախի խորհրդարանի նախկին պատգամավոր, արտաքին հարաբերությունների հանձնաժողովի նախկին նախագահ Վահրամ Աթանեսյանը։
«Իսրայելի կառավարության ազգային անվտանգության հարցերով նախկին խորհրդականը Politico-ին ասել է,-ուշադրություն,- որ հետախուզությունը, Գազայի հատվածում հավաքագրած իր աղբյուրներից տեղեկություն է ունեցել, որ ՀԱՄԱՍ-ը չի գնա էսկալացիայի՝ խուսափելով խաղաղ բնակչության շրջանում զոհերից: Եթե իսրայելական հատուկ ծառայությունները, բանակային հետախուզությունը այդքան դյուրահավատ են, ապա նրանց ամենազորության մասին առասպելը պետք է կեղծ համարել: Դա իրականում այդպես չէ:
Տեւական ժամանակ է՝ Իսրայելը Միացյալ Նահանգներից չի ստանում Իրանին հարվածելու թույլտվություն: Միջազգային մամուլը գրում է, որ ՀԱՄԱՍ-ի գրոհայիններն ընդամենը ,,թնդանոթի միս են,,: Իսրայելի դեմ հարձակումը կազմակերպել է Իրանի Իսլամական հեղափոխության պահապանների կորպուսը՝ ստուգելու հակառակորդի զգոնությունը, ձեռք բերելու հետախուզական բնույթի կարեւոր տեղեկություններ: Սա լավագույն առիթն է, որպեսզի Իսրայելը ինքնապաշտպանական նպատակներով առնվազն օդային հարվածներ հասցնի Իրանին: Մի քանի տասնյակ զինվորականի կորուստը եւ մոտ հիսունի գերեվարումը միշտ կարելի է ,,դուրս գրել,,: Իսկ Իրանի դեմ ռազմագործողությունը բոլորին, այդ թվում եւ վարչապետ Նաթանյահուին կհերոսացնի:
Չափազանց կարեւոր է, որ Թուրքիան խիստ զգուշավոր վերաբերմունք է արտահայտել: Փաստացի իսլամական համերաշխության գործոնը նույնպես չի դրսեւորվում: Ի վերջո, Գազայի հատվածը անկլավային տարածք է եւ գլխացավանք է բոլոր ներգրավված կողմերի համար, իսկ Իրանը միջուկային զենք ունենալուց հինգ րոպե պակաս ռեժիմում է: Այնպես որ, չի կարելի բացառել, որ ՀԱՄԱՍ-ը Իսրայելի դեմ հարձակում է գործել՝ հայտնվելով իսրայելական հատուկ ծառայությունների ծուղակում: Բուն թիրախը, մինչդեռ, Իրանն է: Հրճվելու առիթ չկա: Տարածաշրջանը կարող է պայթել նույնքան կազմակերպվածորեն ,,անսպասելի,,՝ ինչպես մեկօրյա ադրբեջանական ահաբեկչական պատերազմն Արցախում:
ՀԱՄԱՍ-ը Իսրայելը գրոհեց ուղիղ մեկ օր անց այն բանից հետո, երբ ադրբեջանական Աղբենդ գյուղում տեղի ունեցավ Ադրբեջան-Իրան-Նախիջեւան երկաթուղային եւ ավտոմոբիլայան հաղորդակցության նախագծի հիմնարկեքը»,- նշել է Վահրամ Աթանեսյանը։
