Անկասկած, ՀՀ-ում և Արցախում այսօր տիրող սահմանային իրավիճակը մտահոգություն է առաջացնում մեր ժողովրդի համար: Այս մասին այսօր ԱԺ նիստի ժամանակ հայտարարել է «Հայաստան» խմբակցության ղեկավար Սեյրան օհանյանը: Ըստ նրա իրենց քաղաքական ուժը չի պնդում, թե խաղաղության չի ձգտում, չի պնդում, թե հարևանների հետ սահմանները պետք չէ ճշգրտել, սակայն դրա համար համապատասխան պայմաններ իրենք դեռևս չեն տեսնում:
Սահմանագծման և սահմանազատման հիմնախնդիրների մասին հայտարարության ընդդիմադիր խմբակցության նախագիծը օրակարգ ընդգրկելու մասին հարցի քննարկման ժամանակ Օհանյանը նաեւ ասել է, որ հարցն ընդգրկելով օրակարգ՝ հնարավորություն է ստեղծվում ուսումնասիրել և քննարկել այսօր սահմանում տիրող իրավիճակը:
«Ոչ ոք չի ասում, որ մենք չենք ձգտում խաղաղության և ոչ ոք չի ասում, որ մեկ օր սահմանները մեր հարևանների հետ չպետք է ճշտենք: Այո, մեր հարևանների. այսինքն` հակամարտող կողմը պետք է դառնա հարևան հանրապետություն: Առաջին նախապայմանը սա է, որ ստեղծվեն համապատասխան խաղաղության պայմաններ, և այդ շրջանակներում իրականացվի սահմանազատումն ու սահմանագծումը»,-ասաց Օհանյանը:
Գլխադասային հանձնաժողովի բացասական եզրակացությունը նա անընդունելի համարեց: Օհանյանն առաջարկեց քվեարկել կողմ և հարցն ընդգրկել լիագումար նիստի օրակարգ:
Քվեարկությամբ հայտարարության նախագիծը չընդգրկվեց լիագումար նիստի օրակարգ՝ ստանալով 33 կողմ, 64 դեմ ձայն: