Ֆուտբոլի Հայաստանի ազգային հավաքականը Եվրո-2024-ի որակավորման մրցաշարի 7-րդ տուրում մրցակցի դաշտում 0-2 հաշվով պարտվեց խմբի հետնապահ Լատվիայի հավաքականին։
Ռիգայի «Սկոնտո» ստադիոնում կայացած խաղի երկրորդ խաղակեսի սկզբնամասում դաշտի տերերը մնացին 10 հոգով։ 53-րդ րոպեի երկրորդ դեղին քարտի պատճառով խաղադաշտից հեռացվեց Մարցիս Օշսը։
Հայաստանի հավաքականը չկարողացավ օգտվել թվային առավելությունից, փոխարենը երկրորդ գոլը բաց թողեց 68-րդ րոպեին։
Լատվիայի հավաքականն առաջին հաղթանակը տարավ և վաստակեց 3 միավոր, սակայն շարունակում է եզրափակել D խմբի մրցաշարային աղյուսակը։ Հայաստանի հավաքականը 7 միավորով երրորդ տեղում է։ Նույնքան միավոր ունի նաև չորրորդ տեղում գտնվող Ուելսը, որը մեկ հանդիպում պակաս է անցկացրել։ Խմբի առաջատարներն է Թուրքիայի հավաքականը, երկրորդ տեղում Խորվաթիան է։
Լատվիայի դեմ հանդիպումից 5 օր անց Ալեքսանդր Պետրակովի գլխավորած թիմը մակեդոնական Ստրումիցա քաղաքի «Բլագոյ Իստատով» ստադիոնում ընկերական հանդիպում կանցկացնի Հյուսիսային Մակեդոնիայի հավաքականի հետ։