Ղրիմի երկնքում հակաօդային պաշտպանությունը խոցել կամ ռադիոէլեկտրոնային պայքարի միջոցներով ճնշել է 11 անօդաչու թռչող սարք, հայտարարել է բռնակցված երկրամասի ղեկավար Սերգեյ Ակսենովը։ BBC-ի ռուսական ծառայությունը հայտնում է, որ սրա հետ մեկտեղ հարված է եղել Ջանկոյսկի շրջանի զինամթերքի պահեստին։
Որոշում է կայացվել տարհանել մոտակա գյուղերը պայթյունի վայրից հինգ կիլոմետր շառավղով։ Նախնական տեղեկություններով՝ զոհեր չկան։ Երկաթուղով և Ջանկոյ-Սիմֆերոպոլ մայրուղով երթևեկությունը դադարեցվել է։ Սա արդեն վերջին երկու օրվա ընթացքում երկրորդ դեպքն է, երբ անօդաչու թռչող սարքը հարվածում է բռնակցված Ղրիմում գտնվող ռազմական պահեստին։ Շաբաթ օրը Ակսենովը հայտնել էր, որ Կրասնոգվարդեյսկի շրջանի վրա անօդաչու թռչող սարքի հարձակումից հետո զինամթերքի պահեստում պայթյուն է տեղի ունեցել։ Հիշեցնենք, որ ավելի վաղ էլ ՌԴ իշխանությունները հայտնել էին, որ երկուշաբթի գիշերը երկու անօդաչու թռչող սարքեր ընկել Մոսկվայում: Դրանցից մեկը բախվել է ՌԴ ՊՆ գլխավոր շենքի հարակից շինությանը։
