Բաց նամակ Ռուսաստանի հայերի միության նախագահ պարոն Արա Աբրահամյանին
«Հարգելի պարոն Աբրահամյան
Արցախի համար ճակատագրական այս պահին դիմում եմ Ձեզ մի չափազանց կարեւոր հարցով։ 1991 նոյեմբերի 28-ին Հայաստանի Հանրապետության հայցի հիման վրա ԽՍՀՄ Սահմանադրական հսկողության կոմիտեն ԽՍՀՄ Սահմանադրությանը հակասող է ճանաչել Լեռնային Ղարաբաղի ինքնավար մարզը լուծարելու մասին Ադրբեջանի Հանրապետության առ 25.11. 1991թ․ օրենքը։
Ռուսաստանի Դաշնությունը միջազգայնորեն ճանաչված է որպես ԽՍՀՄ իրավահաջորդ, ինչից հետեւում է, որ ՌԴ-ն պարտավոր է հարգել ԽՍՀՄ միջազգային, ինչպես նաեւ նախկին միութենական հանրապետությունների եւ ինքնավար կազմավորումների հանդեպ ունեցած պարտավորությունները։
Խնդրում եմ Ռուսաստանի հայերի միության ամբողջ ներուժը եւ գործիքակազմը համախմբել՝ ՌԴ քաղաքացի հանդիսացող ազգությամբ հայերի ստորագրահավաք-հանրագիր ներկայացնելու ՌԴ Սահմանադրական դատարան՝ հայցելով, որ վերջինս, հանդիսանալով ԽՍՀՄ Սահմանադրական հսկողության կոմիտեի ուղղակի իրավահաջորդ, վերահաստատի Լեռնային Ղարաբաղի ինքնավար մարզը լուծարելու մասին Ադրբեջանի Հանրապետության՝ վերը նշված օրենքի անհամապատասխանությունը ԽՍՀՄ Սահմանադրությանը։
Հարգանքով՝ առաջին գումարման ՀՀ Գերագույն խորհրդի, երրորդ, չորրորդ եւ հինգերորդ գումարումների ԼՂՀ Ազգային ժողովի պատգամավոր Վահրամ Աթանեսյան»։