ՀՀ վարչապետ Նիկոլ Փաշինյանն ԱԺ մշտական հանձնաժողովների համատեղ նիստում ներկայացրել է 2024թ. պետբյուջեի նախագիծը։
Նրա խոսքով, 2024թ. բյուջեի եկամտային մասը 2018թ.-ի համեմատ ավելի քան կրկնապատկվում է. «2024թ. պլանավորվող բյուջեի եկամտային մասը 1 տրլն 367 մլրդ 800 մլն դրամով կամ 105 տոկոսով ավելին է, քան 2018թ. պլանավորված բյուջեն»,- ասել է նա։
Վարչապետը նաև ասել է, որ հաջորդ տարի ակնկալվում է 7 տոկոս տնտեսական աճ. «Մեր կարևորագույն ձեռքումներից մեկը սպառնալիքների և անվտանգային մարտահրավերների միջավայրում մեր մակրոտնտեսական կայունությունն է, որը մենք կարողացանք պահպանել ակնհայտորեն և՛ պատերազմի, և՛ ներքաղաքական անկայունությունների, և՛ համավարակի ընթացքում, և Հայաստանը շարունակում է մնալ բարձր տնտեսական աճի միջավայրում արդեն երկրորդ տարին անընդմեջ. մենք այս տարի սպասում ենք առնվազն 7 տոկոս տնտեսական աճ»։
Վարչապետի խոսքով՝ գնաճի միջավայրը կայուն է և առաջին 9 ամիսների արդյունքներով գնաճի ցուցանիշը 2,8 տոկոս է:
Նիկոլ Փաշինյանի ելույթը ԱԺ մշտական հանձնաժողովներում 2024 թ. պետբյուջեի քննարկումներին