«Զվարթնոց» օդանավակայանում ռուս սահմանապահների հարցը մեզ անհանգստացնում է, ինչպես հանրության մեծ մասին։ Այդ հարցը մեր քաղաքական թիմի օրակարգում է»․ այս մասին այսօր խորհրդարանական ճեպազրույցների ժամանակ հայտարարել է Ազգային ժողովի «Քաղաքացիական պայմանագիր» խմբակցության քարտուղար Արթուր Հովհաննիսյանը։
«Այդ հարցը մեր քաղաքական թիմի օրակարգում է։ Քննարկումներ են տեղի ունենում։ Քննարկումների արդյունքում երբ որոշումներ կլինեն, այդ որոշումների մասին բոլորս կիմանանք ինստիտուցիոնալ ճանապարհով»,- ասել է Հովհաննիսյանը։
Ըստ Հովհաննիսյանի՝ հանրության շրջանում առկա անհանգստությունները կան նաև իշխող քաղաքական թիմում, և այդ կոնտեքստում էլ քննարկվում է։
Հարցին՝ քննարկվում է նրանց դուրս հանելու՞, թե՞ թիվը շատացնելու տարբերակը, պատգամավորը պատասխանել է.
«Ես կարծում եմ, որ մեր հանրության անհանգստությունները չեն վերաբերում նրան, որ սահմանապահների թիվը փոքր է, այլ նրան, որ սահմանապահները թիվ ունեն»։
Արթուր Հովհաննիսյանի խոսքով՝ 6 տարիների ընթացքում բազմաթիվ իրողություններ ի հայտ եկան, և, հետևաբար, յուրաքանչյուր իրողություն իր հետևից պետք է բերի որոշակի դատողություններ, որոշումներ և գործողություններ։
«Նույն տրամաբանությամբ, ցավոք, ուշ գլխի ընկանք, որ ՀԱՊԿ անվտանգային կառույցը չի աշխատում։ Բայց սա ոչինչ չի նշանակում։ Սա նշանակում է՝ որ պահին խնդիր է առաջանում, պետք է գնալ և այդ խնդիրը լուծել»,- ավելացրել է պատգամավորը։