Ուկրաինական պատերազմը, որն արդեն շարունակվում է չորս ամսից ավելի և խլել է տասնյակ հազարավոր մարդկանց կյանքեր, հավանաբար թևակոխում է նոր փուլ: Հուլիսի 7-ին հայտնի դարձավ, որ Ռուսաստանը Դոնբասում մարտերի ժամանակավոր դադար է հայտարարում: Ռուսաստանի Պաշտպանության նախարարության ներկայացուցիչը պարզաբանել էր, որ զինծառայողներին հանգստանալու, տնից նամակներ ու ծանրոցներ ստանալու հնարավորություն է տրվում։ Միևնույն ժամանակ Ուկրաինական պաշտոնական աղբյուրները չեն բացառում, որ Ռուսաստանը առաջիկայում հնարավոր է նոր ուղղություններով հարձակում իրականացնի: Մոսկվան իրականում դեռ որեւէ լուրջ բան չի սկսել Ուկրաինայում: Այս մասին էլ Ռուսաստանի նախագահ Վլադիմիր Պուտինը հայտարարել է Պետդումայի ղեկավարության և խորհրդարանական խմբակցությունների ղեկավարների հետ հանդիպմանը ժամանակ:
«Բոլորը պետք է իմանան, որ, մեծ հաշվով, մենք դեռ որևէ լուրջ բան չենք սկսել: Այսօր մենք լսում ենք, որ մեզ ուզում են հաղթել մարտի դաշտում։ Ի՞նչ կարող եմ ասել, թող փորձեն»,- նշել է Վլադիմիր Պուտինը:
Պուտինն ասել է նաև Արևմուտքն արդեն պարտվել է այս ճակատամարտում, քանի որ Ուկրաինայում հատուկ գործողության մեկնարկը ԱՄՆ կանոնների վրա հիմնված աշխարհակարգի տապալման և բազմաբևեռ աշխարհին անցնելու սկիզբն էր:
Մինչև Պուտինը մեղադրում է արևմուտքին ուկրաիանական պատերազմը հրահրելու համար, Ինդոնեզիայի Բալի կղզում «Մեծ քսանյակի» G 20-ի երկրների, մասնավորապես ԱՄՆ-ի, Ֆրանսիայի, Գերմանիայի եւ Բրիտանիայի արտաքին գերատեսչությունների ղեկավարները քննարկել են Ուկրաինայում Ռուսաստանի հատուկ գործողության իրադրությունը:
Հուլիսի 7-ին հայտնի դարձավ նաև, որ Մեծ Բրիտանիայի վարչապետ Բորիս Ջոնսոնը աշնանը հրաժարական է տալու: Ջոնսոնը համարվում էր Ուկրաինայի անմիջական աջակիցը: Բորիս Ջոնսոնը հուլիսի 8-ին սոցիալական ցանցերում գրառում է արել և Զելենսկուն հերոս է անվանել:
«Ես խոսեցի նախագահ Զելենսկու հետ՝ վերահաստատելու համար Միացյալ Թագավորության շարունակական աջակցությունն Ուկրաինային. Շնորհակալ եմ քո ընկերության համար, Վլադիմիր, դու հերոս ես, բոլորը սիրում են քեզ»,- գրել է Բորիս Ջոնսոնը։
Միևնույն ժամանակ Ուկրաինայի նախագահ Վոլոդիմիր Զելենսկին վստահություն է հայտնել, որ Մեծ Բրիտանիայի քաղաքականությունը Ուկրաինայի նկատմամբ չի փոխվի վարչապետ Բորիս Ջոնսոնի հրաժարականից հետո։ Զելենսկին Ջոնսոնին անվանել է «Ուկրաինայի իսկական բարեկամ»:
Միջազգային փորձագիտական շրջանակները կարծիք են հայտնում, որ Ջոնսոնի հեռանալուց հետո Ուկրաինական ճգնաժամում կարող են լուրջ փոփոխություններ տեղի ունենալ: Բրիտանական մամուլը գրում է, որ Բորիս Ջոնսոնի հրաժարականից հետո Մեծ Բրտիանիայի վարչապետի առավել հավանական թեկնածուն կլինի պաշտպանության նախարար Բեն Ուելեսը։
