Անթալիայում կայացել է Հայաստանի եւ Թուրքիայի արտաքին գործերի նախարարներ Արարատ Միրզոյանի եւ Մևլութ Չավուշօղլուի հանդիպումը: Այն տեղի է ունենում Անթալիայի դիվանագիտական ֆորումի շրջանակում:
Արարատ Միրզոյանն ասել է, որ հայկական կողմը պատրաստ է շարունակել գործընթացն առանց նախապայմանների։ Նա նշել է, որ Երեւանը վճռական է Հարավային Կովկասում խաղաղության եւ կայունությանն հասնելու հարցում։
«Անադոլու» գործակալությունը հայտնում է, որ Չավուշօղլուն հայ պաշտոնակցի հետ բանակցություններն անվանել է «շատ կառուցողական եւ արդյունավետ»։
«Քննարկվել են երկկողմ հարաբերությունների լիարժեք կարգավորմանն ուղղված քայլերը։ Ուզում եմ գոհունակությամբ փաստել, որ մենք ջանքեր ենք գործադրում Կովկասում խաղաղության հաստատման համար։ Թուրքիայի եւ Հայաստանի միջեւ քայլերը դրական է ընկալում նաեւ Ադրբեջանը։ Բաքուն աջակցում է այս գործընթացին։ Տարածաշրջանում խաղաղությունն ու կայունությունը համապատասխանում են բոլոր կողմերի շահերին»,- ասել է թուրք նախարարը։
