Բելառուսի նախագահ Ալեքսանդր Լուկաշենկոն, հանդիպելով ՀԱՊԿ խորհրդարանական վեհաժողովի խորհրդի նիստի մասնակիցների հետ, հայտարարել է, որ կառույցի անդամների ինքնիշխանությունն ու անկախությունը պահպանելու համար կարևոր է ՀԱՊԿ-ում միասնության պահպանումը։ Այս մասին հայտնում է «BelTA»-ն։
«Վստահ եմ, որ Բելառուսի նախագահության կարգախոսը՝ «համերաշխության և համագործակցության միջոցով խաղաղություն և անվտանգություն», համապատասխանում է ՀԱՊԿ բոլոր անդամների շահերին։ Այս կապակցությամբ չի կարելի խուսափել մեր շարքերի միասնության հարցից։ Բելառուսը իր նախագահության շրջանակներում նպատակ ունի անհրաժեշտ ջանքեր գործադրել ՀԱՊԿ երկրների համախմբվածության բարձրացման համար։ Խզում թույլ մի տվեք մեր պատմության այս կրիտիկական պահին։ Աշխարհի ուժեղները փորձում են վերաբաշխել այն, և մենք ուշադրության կենտրոնում ենք։ Մենք պետք է միանանք իրար: Մեր պետությունների ինքնիշխանությունն ու անկախությունը պահպանելու ուրիշ այլընտրանք չկա», – նշել է Լուկաշենկոն։
