Երկրաշարժը Շիրակի մարզում մեծ ուժգնությամբ զգացվել է Գյումրիում՝ բնակելի շենքերում, ինչպես նաեւ Աշոցքի տարածաշրջանում: Այս մասին հայտնել է Շիրակի մարզպետ Նազելի Բաղդասարյանը։ Ըստ մարզպետի՝ Աշոցք համայնքի ղեկավար Կարեն Մանուկյանի փոխանցմամբ այս պահի դրությամբ արձանագրված փլուզումներ չկան։ Շիրակի մարզային փրկարարական վարչության պետ Ալեքսան Գյոզալյանի փոխանցմամբ այս պահի դրությամբ Գյումրիում ևս փլուզման ահազանգեր չեն եղել։
Մարզպետի փոխանցմամբ՝ Գյումրիում մասնակի քարաթափման դեպքեր են գրանցվել վթարային շենքերում, մասնավորապես՝ Անտառավան 26 շենքում։ ԱԻՆ աշխատակիցները տեղում են։
Շտապ օգնության ծառայությունում գրանցված զանգերը հիմնականում մարդկանց սթրեսային վիճակի ու արյան ճնշման բարձրացման պատճառով են, ինչը բժիշկների հավաստմամբ, պայմանավորված է վախով։
Մարզպետը հայտնել է նաեւ, Գյումրու թաղամասերից 2-ը հոսանքազրկվել են, նաեւ Մարմաշեն եւ Հայկավան բնակավայրերը։
23։50-ին հոսանքը վերականգնվել է։