Ես իմ ձեռքի տակ ունեմ բոլոր փաստաթղթերը, համանախագահների բոլոր առաջարկությունները, բայց առանց իրենց հետ համաձայնեցնելու՝ ես դա կոռեկտ չեմ համարում հրապարակելը: Այս մասին հայտարարել է ՀՀ երրորդ նախագահ Սերժ Սարգսյանը ԼՂ հիմնախնդրի բանակցային գործընթացի վերաբերյալ հարցազրույցի ժամանակ։
«Եթե լինի ծայրահեղ անհրաժեշտություն, ես դա կանեմ»,-ասաց Սերժ Սարգսյանը։
Սերժ Սարգսյանի խոսքով չեր կարող լինել փաստաթուղթ, որն ամբողջովին կբխեր Հայաստանի շահերից։ Սերժ Սարգսյանը խոսելով Կազանյան բանակցությունների եւ քննարկվող փաստաթղթի մասին նշել է, որ Կազանյան փաստաթուղթը վերջին աշխատանքային փաստաթուղթն է եղել։
«Ամբողջ խնդիրը նրանում է, որ, այո, Կազանում փաստաթուղթ չընդունեցինք: Այնտեղ պետք է հռչակագիր լիներ, այսինքն՝ առանց ստորագրությունների հայտարարվեր, քանի որ հիմնական փաստաթուղթը պետք է լիներ միջպետական պայմանագիրը` համապարփակ պայմանագիրը Լեռնային Ղարաբաղի խնդրի խաղաղ լուծման, որն ամեն ինչ ներառելու էր:Կազանյան փաստաթղթերից հետո չի եղել որևէ փաստաթուղթ, որևէ առաջարկություն համանախագահների կողմից, որ այս թե այն կերպով հիմնականում պաշտպանված չլինեն հիմնական այն դրույթները, որոնք եղել են Կազանյան փաստաթղթում, որովհետև Կազանյան փաստաթուղթը ծնունդ է Մադրիդյան սկզբունքների»,-ասաց Սերժ Սարգսյանը։
