Հայաստանի եւ Ադրբեջանի միջեւ սահման չկա, այս մասին այսօր հայտարարել է ՀԱՊԿ գլխավոր քարտուղար Ստանիսլավ Զասը: «Վալդայ» ակումբի կազմակերպած համաժողովի ժամանակ Զասը նաեւ հույս է հայտնել, որ պատերազղմի դարաշրջանը ավարտվում է:
«Անկասկած, լարվածության օջախներ կան, և այդպիսիք կան նաև հայ-ադրբեջանական սահմանին: Ես այնտեղ եղել եմ, տեսել եմ սեփական աչքերով, թե ինչ է այնտեղ կատարվում: Բայց ըստ էության, այնտեղ սահման՝ որպես այդպիսին, չկա, կա շփման գիծ, կան հենակետեր, դիտակետեր: Պարբերաբար լինում է փոխհրաձգություն: Այդպես չպետք է լինի»,-նշել է Ստանիսլավ Զասը:
ՀԱՊԿ Գլխավոր քարտուղարի խոսքով՝ այժմ կողմերի առջև դրված է սահմանազատման և սահմանագծման լուրջ խնդիր, դա մեծ և բարդ ծավալի աշխատանք է, բայց, այնուամենայնիվ, դա թույլ կտա էականորեն ամրապնդել տարածաշրջանի անվտանգությունը:
«Կա զգուշավոր լավատեսություն, որ ավարտվում է պատերազմի մի ամբողջ դարաշրջան, և սկսվում է նոր դարաշրջան: Ես կարող եմ սխալվել այդպիսի լավատեսությամբ, բայց այնուամենայնիվ, պետք է ողջունել այն քայլերը, որոնք այժմ արվում են խաղաղության հաստատման ուղղությամբ»,- հավելել է ՀԱՊԿ գլխավոր քարտուղարը
Ստանիսլավ Զասը խոսել է նաեւ Հայաստանին ռազմական օգնություն ցուցաբերելու հնարավորության մասին: ՀԱՊԿ գլխավոր քարտուղարն ընդգծել է, որ եթե նման դիմում լինի, ապա ՀԱՊԿ բոլոր արձագանքման կենտրոնները եւ մեխանիզմները կգործարկվեն: