Տավուշի մարզի Ենոքավան գյուղում 8-րդ անգամ տեղի ունեցավ հայկական բույսերին նվիրված «ՀայԲույս» փառատոնը։ Փառատոնին մասնակցում էին մեծ մասամբ հայ արտադրողները, շուրջ 50 տաղավարներում ներկայացնելով թեյեր, ձեռագործ սփռոցներ, բույսերից պատրաստված տիկնիկներ, զարդեր, բուսական կոսմետիկա ու յուղեր:
Մասնակիցների թվում էին նաև այլազգի զբոսաշրջիկները: Չնայած հորդառատ անձրևին ու մառախուղին, արևի շողալուն պես ներկաները ծանոթացան բույսերի կիրառման եղանակներին, պատրաստեցին ծաղկե գլխազարդեր, պարեցին ազգագրական պարեր եւ մասնակցեցին վարպետության դասերի: Ներկայացված էր նաև ՀՀ-ում Շվեյցարիայի դեսպանության տաղավարը, որտեղ հյուրասիրում էին պանիր ու գինի:
«ՀայԲույս» ամենամյա փառատոնի համահիմնադիր Իրինա Չիբուխչյանը փառատոնն օգտակար է համարում իր կրթական բաղադրիչով. «Մեր առջև նպատակ ենք դրել հանրայնացնել խոտաբույսերի օգտագործումը: Կարևոր է հասկանալ՝ երբ և ինչպես ճիշտ հավաքել բույսերը, նաև ցույց տալ, որ Հայաստանի խոտաբույսերը միայն ուրցն ու դաղձը չեն, այլ բազմատեսակ են և կիրառության տարբեր ձևեր ունեն, օրինակ՝ օգտագործում են զարդեր պատրաստելու, շինարարության, կոսմետիկայի ու բժշկության մեջ»:
Փառատոնի ավանդական մասը իրականացվեց վերջում. Հաղորդավար Տիգրան Հարությունյանը հայտարարեց, որ բոլոր ցանկացողները մասնակցեցին աշխարհում խաղաղությունը խորհրդանշող հսկայական բրդուճի պատրաստմանը, որի բաղադրիչներն են՝ լավաշ, պանիր եւ կանաչիներ, իսկ երկարությունը՝ 56,6 մետր:
Հավելենք, փառատոնի մուտքն անվճար է, նախատեսված է բոլոր տարիքային խմբերի համար, իսկ առաջին անգամ այն անցկացվել է 2015 թվականին։
