ԱԺ «Քաղաքացիական պայմանագիր» խմբակցության պատգամավորներն առաջարկում են Արցախի շուրջ ստեղծված իրավիճակի վերաբերյալ ԱԺ հայտարարության նախագծի՝ ՌԴ-ին ուղղված հատվածում օգտագործել կիրառել ոչ թե «կոչ ենք անում», այլ՝ «պահանջում ենք» բառակապակցությունը։
«Կարծում եմ՝ ճիշտ կլինի, որ մենք ոչ թե կոչ անենք, այլ պահանջենք ՌԴ-ից՝ կատարել իր պարտականությունները, իսկ արևմտյան գործընկերներին ոչ թե կոչ անենք, այլ՝ խնդրենք, որ մասնակցեն»,- ասաց պատգամավոր Վիգեն Խաչատրյանը։
ՔՊ խմբակցության պատգամավոր Արսեն Թորոսյանը ևս նման առաջարկ արեց՝ ասելով, որ ՌԴ-ին ու Արևմուտքին միաժամանակ կոչ անելը, հաշվի առնելով յուրաքանչյուրի պատասխանատվության չափը, սխալ է. «Կան պատասխանատվության տարբեր չափեր՝ կնքված համաձայնագրերի պատճառով»։
ՔՊ խմբակցության ղեկավար Հայկ Կոնջորյանն արձագանքեց, որ հանրության շրջանում իսկապես այդ ակնկալիքը կա, որ ռուս խաղաղապահ կոնտինգենտը ձեռնարկի բոլոր միջոցները, որպեսզի իրավիճակը Լաչինի միջանցքում կարգավորվի, և միջանցքը բացվի։ Ըստ նրա՝ Ադրբեջանը տանում է ռուս խաղաղապահ զորախմբի արժեզրկման ու հեղինակազրկման գործողություն։ Միաժամանակ, Կոնջորյանը նշեց, որ կքննարկեն այդ առաջարկները։
