Այսօր Ազգային ժողովն արտահերթ նիստում երկրորդ ընթերցմամբ չընդունեց ՀՀ քաղաքացիական օրենսգրքում փոփոխություն կատարելու մասին օրենքի նախագիծը, ըստ որի պետական, կամ համայնքային պատկանելության հողամասի վրա ինքնակամ կառուցված կառույցները օրինականացման ենթակա չէին լինելու և ապամոնտաժվելու էին: Առաջին ընթերցմամբ նախագիծն ընդունվել էր։ Նախագծի հեղինակներն են ԱԺ «Իմ քայլը» խմբակցության մի խումբ պատգամավորներ։
Ըստ հիմնավորման` նախորդ տարիներին ձևավորվել է պրակտիկա, երբ տնտեսվարող սուբյեկտներն ու ֆիզիկական անձինք կառուցապատումը կատարում էին առանց շինարարության թույլտվության, իսկ այնուհետեւ դիմում համայնքի ղեկավարին՝ ինքնակամ կառույցներն օրինականացնելու խնդրանքով: Պատճառն այն է, որ ինքնակամ շինությունների օրինականացումն ավելի արագ է կատարվում և ավելի մատչելի է, քան օրինական կարգով շինարարության թույլտվություն ստանալը: Այս փոփոխությամբ համայնքը նաև իրավունք էր ստանալու ապամոնտաժելու ինքնակամ կառույցները՝ առանց վարչական վարույթ իրականացնելու:
Հիշեցնենք, որ վերջին օրերին Երեւանի քաղաքապետարանը մայրաքաղաքի տարբեր հատվածներում ապամոնտաժում է ապօրինի կառույցները։
