Ուկրաինայի նախագահ Վլադիմիր Զելենսկին հայտարարել է, որ պատրաստ է Ռուսաստանի հետ քննարկել Ղրիմի և Դոնբասի հանրապետությունների ճանաչման հարցերը այն բանից հետո, երբ ուկրաինական կողմը ստանա անվտանգության երաշխիքներ։ Այս մասին տեղեկացնում է ՏԱՍՍ գործակալությունը:
«Սա շատ դժվար պատմություն է բոլորի համար։ Ե՛վ Ղրիմը, և՛ Դոնբասը բոլորի համար են։ Իսկ այս իրավիճակից ինչ-որ ելք գտնելու համար պետք է կատարել այս առաջին քայլը, որի մասին ես ասացի՝ անվտանգության երաշխիքներ, պատերազմի ավարտ»,- այս մասին նա ասել է եվրոպական երկրների և Ուկրաինայի հեռուստաընկերություններին տված հարցազրույցում, որը հրապարակվել է Ուկրաինայի հանրային հեռուստատեսության կայքում։
Զելենսկու խոսքով՝ ինքը պատրաստ է այդ հարցերը քննարկել ՌԴ նախագահ Վլադիմիր Պուտինի հետ հանդիպմանը։
«Ռուսաստանի նախագահի հետ առաջին հանդիպմանը ես պատրաստ եմ բարձրացնել այդ հարցերը, դրանք արդիական են, մեզ համար շատ կարևոր են։ Բայց ես վստահ եմ, որ այդ հանդիպմանը այս որոշումը չի կայացվի։ Եթե անկեղծ լինենք, անվտանգության երաշխիքների հարցում կխոսենք սահմանադրական փոփոխությունների, ուկրաինական օրենսդրության փոփոխությունների մասին, և եթե խոսենք այս մասին, ապա ամեն դեպքում դա կորոշի ոչ միայն նախագահը, այլ նաեւ Ռադան, և Ուկրաինայի ժողովուրդը»,- ասաց նա։