Կառավարությունն այսօրվա նիստում որոշվեց բարձրացնել դիվանագետներին տրվող փոխհատուցման գումարի չափը: ԱԳ նախարար Արարատ Միրզոյանն ասաց, որ օտարերկրյա պետություններ մեկնող դիվանագիտներին օրենքով տրվում է փոխհատուցում։ Տարիներ շարունակ այդ չափը չի բարձրացվել, բայց պայմանավորված տնտեսական, ֆինանսական այլ գործոններով՝ այսօր կա մի իրավիճակ, որ բազմաթիվ երկրներում ՀՀ կողմից տրվող փոխհատուցումը նույնիսկ չի համապատասխանում տվյալ երկրում անհրաժեշտ նվազագույն ծախսերին։
Վարչապետ Նիկոլ Փաշինյանն անդրադառնալով հարցին ասաց, որ Հայաստանի Հանրապետությունը 2020, 2021 թվականներին, այսօր էլ կանգնած է բավական լուրջ մարտահրավերների առաջ։
«Մենք առերեսվել ենք աղետալի իրադարձությունների։ Բայց մենք պետք է հասկանանք խորքային պատճառները, թե ինչն է պատճառը։ Ինձ համար եզարակացությունը մեկն է, որ դրա առանցքային և սկզբունքային պատճառը ինստիտուցիոնալ կիսակատարությունն է, որը մենք ունենք և ունեցել ենք ՀՀ-ում։ Եվ մենք 30 տարվա անկախությունից ի վեր արձանագրում ենք, որ մենք դիվանագիտական ծառայության կազմակերպման գործում ունենք խորշեր։ 2018-2019 թվականների դրությամբ մենք դիվանագիտական ծառայության օղակներ ենք ունեցել, որոնք ֆինանսավորվել են ինչ-որ անհատ անձանց գրպանից։ Ասենք՝ դեսպանատուն, որը ֆինանսավորվում է անհատի գրպանից։ Պետական ինստիտուտների կայացման մասին է խոսքը։ Այո, մենք այսօր շատ ծանր որոշում ենք կայացրել, որոշել ենք, որ պետք է մեր երկրի ինստիտուցիոնալ բացերը լուծենք։ Այսօր մենք խոսում ենք արտաքին մարտահրավերների մասին, շատ հաճախ քննադատում ենք դիվանագիտական ծառայությանը։ Բայց հարց տվե՞լ ենք, իրենք ինչ պայմաններում են աշխատում։ Դա մոտավորապես նույնն է՝ մենք օլիմպիական խաղերին ուղարկենք վազորդի՝ մի մարզակոշիկով և ասենք՝ գիտես, պետք է մրցակցես մեր երկրի դրոշն ու զինանշանը բարձրացնես։ Չի լինի այդպես, հետևաբար, այս կարգի որոշումները, գիտենք՝ դժվար է, մենք գիտենք, որ սա անում ենք մեր քաղաքական ռեսուրսի հաշվին, ընդհուպ մարդկանց վստահության հաշվին, բայց մեր այստեղ գտնվելը անիմաստ կլինի, եթե ինստիտուցիոնալ կայացման ճանապարհ չանցենք՝ մեր հատուկ ծառայություններից սկսած, պետական մարմիններից սկսած: Թեկուզ մեր քաղաքական կապիտալը զրոյացնելու հաշվին մենք պետք է պետական ինստիտուտների եւ պետական համակարգի կայացման ճանապարհով գնանք: Մենք ունենք կամք մեր անելիքը անելու, եւ մենք մեր անելիքը անելու ենք»,- նշեց Նիկոլ Փաշինյանը։