Կառավարության նիստում վարչապետ Նիկոլ Փաշինյանը հայտարարեց, որ ինչպես սպասվում էր, Հայաստանում մոտենում է կովիդի համավարակի հերթական ալիքը: Նա նշեց, որ չորրորդ, հինգերորդ օրն անընդմեջ ամենօրյա դեպքերի էական տոկոսային աճ կա, ինչը նշանակում է, որ «օմիկրոն» տեսակի շտամը, որը հայտնի է իր տարածելիության մեծ արագությամբ, կամաց-կամաց մտնում է գործողության մեջ։
«Հետևաբար, մենք պետք է նորից վերադառնանք կորոնավիրուսի հետ կապված տագնապային վիճակի»,- ասաց նա։
Առողջապահության նախարար Անահիտ Ավանեսյանն էլ ներկայացրեց համավարակով պայմանավորված իրավիճակի թվային տվյալները:
«Մենք այսօր արձանագրել ենք 621 դրական դեպք՝ 5838 թեստավորված անձանցից։ Ունեցել ենք 1 մահ։ Պատվաստումային գործընթացի արդյունքում մենք արդեն իսկ ունենք ամբողջական՝ երկու դեղաչափն ստացած 805 550 քաղաքացի, որը կազմում է մեծահասակ բնակչության 35,7 տոկոսը, և դեռ առաջին դեղաչափն ստացած 987 084 քաղաքացի, որը կազմում է մեծահասակ բնակչության 43,7 տոկոսը։ Վերջին շաբաթվա ընթացքում ակտիվացել է նաև խթանիչ դեղաչափերի պատվաստումների ընթացքը»,- ասաց Ավանեսյանը։
Նախարարի խոսքով «օմիկրոն» շտամի դեմ պայքարելու քաղաքականությունը շարունակում է մնալ պատվաստումը, ինչը պաշտպանում է մահվան դեպքերից ու նվազեցնում ռիսկը։