ՌԴ ԱԳ նախարարությունը մանրամասներ է հայտնել Մոսկվայում դեկտեմբերի 10-ին տեղի է ունեցած «3+3» խորհրդատվական տարածաշրջանային պլատֆորմի առաջին նիստի մասին։ Ըստ ՌԴ արտաքին գերատեսչության` նիստին մասնակցել են Ռուսաստանի, Հայաստանի (Հայաստանի կողմից հանդիպմանը մասնակցել է ՀՀ ԱԳ նախարարի տեղակալ Վահե Գևորգյանը), Թուրքիայի և Ադրբեջանի փոխարտգործնախարարները, ինչպես նաև Իրանի ԱԳՆ գլխավոր տնօրենը: Վրաստանի ներկայացուցիչները, որոնք նույնպես հրավիրվել էին, ձեռնպահ են մնացել հանդիպմանը մասնակցելուց:
Քննարկվել են տարածաշրջանային բազմապլան գործակցության զարգացման հեռանկարները: Պայմանավորվածություն է ձեռք բերվել հարթակի աշխատանքը կենտրոնացնել այն գործնական հարցերի վրա, որոնք հետաքրքրություն են ներկայացնում բոլոր մասնակիցների համար:
Դրանց թվում են վստահության բարձրացման միջոցները, փոխգործակցությունը առևտրատնտեսական, տրանսպորտային և մշակութային-հումանիտար ոլորտներում, հակազդեցությունը ընդհանուր մարտահրավերներին ու սպառնալիքներին:
Հինգ երկրների ներկայացուցիչները հետաքրքրություն են հայտնել՝ ձևաչափի աշխատանքին Վրաստանի միանալու հարցում, որի համար «դուռը» բաց է մնում:
Քննարկվել են հետագա անելիքները։
