Ադրբեջանը չի փոխում իր վարքագիծը և հայ-ադրբեջանական բանակցություններից առաջ և հետո կրկին փորձում է գետնի վրա ավելի ագրեսիվ վարքագիծ դրսևորել՝ նպատակ ունենալով ավելին ստանալ բանակցությունների սեղանի շուրջ։
«Արմենպրես»-ի հաղորդմամբ՝ այս մասին ԱԺ-ում լրագրողների հետ ճեպազրույցում ասաց ԱԺ արտաքին հարաբերությունների մշտական հանձնաժողովի նախագահ Սարգիս Խանդանյանը՝ անդրադառնալով վերջին շրջանում Ադրբեջանի կողմից սահմանային լարվածության հրահրմանը։
«Ինչ վերաբերվում է Երասխի հատվածում տեղի ունեցած միջադեպին և ընդհանրապես վերջին շրջանի փոխհրաձգության ակտիվացմանը, մտահոգիչ է, հատկապես, որ դրանք ընթանում են ակտիվացած բանակցային գործընթացին զուգահեռ։ Կրկին տեսնում ենք Ադրբեջանի վարքագիծը, որ բանակցություններին ընդառաջ կամ դրանից հետո փորձում է գետնի վրա ավելի ագրեսիվ վարքագիծ ցուցաբերել՝ փորձելով ավելին ստանալ բանակցությունների սեղանի շուրջ»,- ասաց Խանդանյանը։
ԱԺ արտաքին հարաբերությունների մշտական հանձնաժողովի նախագահը հատկանշական է համարում այն, որ Ադրբեջանի զինված ուժերը Երասխում քաղաքացիական ենթակառուցվածքներ են թիրախավորել։
«Այն գործարանի շինարարության ուղղությամբ էր հրաձգություն եղել, որտեղ ամերիկյան ներդրումներ կան և որը չափազանց կարևոր նախագիծ է Հայաստանի Հանրապետության համար։ Կարծում եմ, Արտաքին գործերի նախարարության հայտարարությունը արտահայտում էր այս մտահոգությունները։ Սա չի փոխում մեր դիրքորոշումները, բարձրաձայնում ենք այս միջադեպերի մասին և գիտեմ, որ Եվրամիության քաղաքացիական առաքելությունը ևս արձանագրում է սրանք և անդամ երկրներին պարբերաբար հաղորդում է դիտարկումների մասին։ Ենթադրում եմ, որ երեկվա միջադեպի վերաբերյալ ևս եղել է նրանց կողմից դիտարկում»,- եզրափակեց Խանդանյանը։
