ԱՄՆ-ում ՀՀ դեսպանությունը, Վաշինգտոնի հայ համայնքի հետ գործակցությամբ, նախաձեռնել է անվանի հայերի հետ հանդիպումների շարք, որի նպատակն է հաջողության հասած մարդկանց պատմություններով ոգեշնչել հատկապես երիտասարդներին։ Այս շարքի առաջին ընդունելությունը տեղի ունեցավ ս․թ․ մարտի 12-ին՝ ի պատիվ առողջապահության և ֆիզիոլոգիայի բնագավառում Նոբելյան միցանակակիր, հայազգի գիտնական Արտեմ Փաթափությանի։
Միջոցառմանը մասնակցում էին ինչպես հայ համայնքի, այնպես էլ՝ ԱՄՆ գործադիր և օրենսդիր մարմինների, դիվանագիտական կորպուսի, գիտական շրջանակների ներկայացուցիչներ, ԱՄՆ բուհերի ուսանողներ։
Ընդունելության պաշտոնական հատվածի բացումը կատարեց դեսպան Մակունցը՝ ներկայացնելով Արտեմ Փաթափությանի անցած ուղին: Դոկտոր Փաթափությանն իր խոսքում անդրադարձավ իր կյանքի պատմությանը, կիսվեց նվաճումներին հասնելու ճանապարհին հանդիպած դժվարություններով ու հաջողություններով, պատասխանեց ներկաների հարցերին։
Միջոցառման ընթացքում Շամասյան քույրեր տրիոյի կատարմամբ հնչեցին աշխարհահռչակ հայ կոմպոզիտորների ստեղծագործություններ։