ՀՀ Գիտությունների ազգային ակադեմիայի (ԳԱԱ) Գիտակրթական միջազգային կենտրոնի (ԳԿՄԿ) Ուսանողական գիտական ընկերության (ՈւԳԸ), ԳԿՄԿ աշխատակիցների նախաձեռնությամբ և ՀՀ ԳԱԱ Երկրաբանական գիտությունների ինստիտուտի, Հրաչյա Բունիաթյանի անվան կենսաքիմիայի ինստիտուտի համատեղ աջակցությամբ օրերս` Ամանորին ընդառաջ, կազմակերպվեց բարեգործական ակցիա, որի ընթացքում Շիրակի մարզի Ախուրյան գյուղում բնակվող մեկ բազմազավակ ընտանիքի տրամադրվեց օգնություն:
Նշենք,որ ընտանիքն սպասում է իր 11-րդ երեխայի լույս աշխարհ գալուն։ Նրանք սոցիալապես անապահով են:
ՈՒԳԸ անդամների նախաձեռնությամբ հավաքվեց հագուստ, խաղալիքներ, իսկ նվիրաբերված գումարով գնվեց սնունդ:
ՈՒԳԸ-ի փոխնախագահ Հռիփսիմե Խաչատրյանը նշեց, որ նրանց, կարծես թե, հաջողվեց դառնալ հեքիաթային տոնին ընդառաջ երազանք կատարող հրաշագործներ, ԳԱԱ ԵԳԻ աշխատակից Հայկ Հովակիմյանն էլ ուրախ էր, որ կարողացել էին երեխաներին ժպիտներ պարգևել:
ՈՒԳԸ նախագահ Նարեկ Սահակյանի խոսքով՝ անտարբերությունը կարիքավոր մարդկանց հանդեպ չարիք է, և հասարակության յուրաքանչյուր անդամ պետք է ձգտի հնարավորինս օգտակար լինել իր ուժերի ներածին չափով:
Միանշանակ է, որ նման ընտանիքներին սոցիալական աջակցությունից զատ անհրաժեշտ է հոգեբանական, կրթական և բարոյական աջակցություն։
Հեղինակ՝ ՀՊՄՀ լրագրության բաժնի 2-րդ կուրսի ուսանողուհի Նատալի Մինասյան
