Արցախի շփման գծում օգոստոսի 1-ի լույս 2-ի գիշերը և առավոտյան 9:00-ի դրությամբ, իրադրությունը էական փոփոխությունների չի ենթարկվել: Արցախի Պաշտպանության բանակը տեղեկացնում է, որ կայուն լարվածությունը պահպանվում է: Արցախի պաշտպանական գգերատեսչության տարածած հաղորդագրությունում ասված է նաև, որ Արցախի Հանրապետության ղեկավարությունը՝ Պաշտպանության բանակի հրամանատարության ու ռուսական խաղաղապահ զորակազմի հրամանատարության հետ համատեղ, քայլեր են ձեռնարկում լարվածության լիցքաթափման և հետագա սրացումներ թույլ չտալու համար:
Ավելի վաղ Արցախի Պաշտպանության բանակը տեղեկացրել էր, որ Արցախի Հանրապետության հյուսիսային և հյուսիս-արևմտյան սահմանագոտու մի շարք հատվածներում օգոստոսի 1-ին, ադրբեջանական ստորաբաժանումները դիմել են սադրանքի՝ կատարելով շփման գիծը հատելու փորձեր, որոնք կասեցվել են ՊԲ ստորաբաժանումների ուժերով: Կատարվածի առնչությամբ երեկ հայտարարությամբ էր հանդես եկել Արցախի արտաքին գործերի նախարարը։ Դավիթ Բաբայանը նշել էր, որ անհանգստանալու եւ խուճապի մատնվելու կարիք չկա, ամեն ինչ գտնվում է մեր զինված ուժերի վերահսկողության ներքո։