ՀՀ վարչապետ Նիկոլ Փաշինյանն այսօր ԱԺ-ում անդրադառնալով Լեռնային Ղարաբաղում տեղակայված ռուս խաղապահների մանդատի հարցին նշեց, որ Սոչիում հայկական կողմն առաջարկել է ԼՂ-ում տեղակայված ռուսաստանցի խաղաղապահների մանդատը երկարացնել անորոշ ժամանակով, 20 տարով, 15 տարով և այլն։
Փաշինյանը նշեց, որ նոյեմբերի 9-ի եռակողմ հայտարարությամբ ԼՂ-ում խաղաղապահների ներկայության ժամկետը երկարացվում է ինքնաբերաբար, այսինքն՝ դա կարող է չերկարացվել միայն, եթե կողմերից որևէ մեկն առարկություն ներկայացնի։
«Մեր առաջարկն այս փուլում չընդունվեց, բայց իմ տպավորությամբ՝ դա մի հարց է, որը դառնում է օրակարգային։ Եվ ես լիարժեք համաձայն եմ, որ ԼՂ-ի հայության իրավունքների և անվտանգության երաշխավորման կարևորագույն գործոնը խաղաղապահների ներկայությունն է այնտեղ, քանի դեռ չեն ստեղծվել հուսալի մեխանիզմներ և երաշխիքներ՝ անվտանգության և իրավունքների ապահովման համար։ Ես ուզում եմ ասել, որ մեր քաղաքականությունը Սոչիից առաջ և Սոչիից հետո ոչ մի, նույնիսկ նվազագույն փոփոխություն չի կրել, որովհետև մեր քաղաքականությունը եղել է դա։ Եվ շատ ուրախ եմ արձանագրել, որ Սոչիում վերահաստատվեց Պրահայում ձեռք բերված պայմանավորվածությունները։ Եվ մենք շարունակելու են մեր ակտիվ գործունեությունը խաղաղության օրակարգի իրականացման և իրագործման շուրջ։ Ես կարծում եմ, որ սեպտեմբերի 13-ի ագրեսիային և նախորդ տարվա մայիսի 12-ի ագրեսիային մենք անդրադարձել ենք բավարար չափով, դիրքորոշումները հրապարակային արտահայտել ենք, ես դա չեմ ուզում կրկնել։ Բայց ուզում եմ մի կարևոր հանգամանքի վրա հրավիրել մեր ուշադրությունը խաղաղության օրակարգի առաջ մղման և տարածաշրջանի հարաբերությունների առումով։ 2022-ը բացառիկ է նրանով, որ Հայաստանի ղեկավարն ուղիղ շփում է ունեցել առանց բացառության բոլոր հարևան երկրների ղեկավարների հետ»,- հայտարարեց նա։