Երևանի բուսաբանական այգում առաջին անգամ նշվեց Գիտության համաշխարհային օրը
Ինչպես բոլոր ակադեմիական կառույցներում, այդպես էլ Երևանի բուսաբանական այգում տեղի ունեցավ միջոցառում Գիտության համաշխարհային օրվա առթիվ, միայն թե մի տարբերությամբ, որ այստեղ այն նշվում էր առաջին անգամ:
Միջոցառումը նախատեսված էր դպրոցականների և ԲՈՒՀ-երի ուսանողների համար:
2001 թվականին ՅՈՒՆԵՍԿՕ-ի որոշմամբ նոյեմբերի 10-ը հռչակվեց »Հանուն խաղաղության և գիտության զարգացման համաշխարհային օր»:
ՀՀ ԳԱԱ Ա. Թախտաջյանի անվան բուսաբանության ինստիտուտի և Երևանի բուսաբանական այգու երիտասարդ գիտաշխատողները, միջոցառման շրջանակներում, դպրոցականներին և ուսանողներին ներկայացրել են իրենց աշխատանքային առօրյան, նպատակ ունենալով, քարոզել և տարածել բուսաբանական գիտելիքներ:
Խմբերը շրջայց են կատարել արևադարձային և մերձարեւադարձային բույսերի ջերմատանը, հնաբուսաբանության թանգարանում:
Բացի տեսական մասից, այցելուները նաև միջոցառման պրակտիկ հատվածին են մասնակցել:
Միջոցառման կազմակերպական աշխատանքների պատասխանատու, գիտաշխատող Մանիկ Գրիգորյանը նշեց, որ այս միջոցառումը շատ կարևոր կարող է լինել հատկապես դպրոցականների համար` մասնագիտության ընտրության հարցում:
Հեղինակ՝ Անի Ղևոնդյան