Պատասխանելով պատգամավոր Տիգրան Ուրիխանյանի հարցին, թե արդյո՞ք հնարավոր է, որ եթե ՀՀ-ն պատժիչ գործողություններ իրականացնի մեր սահմանը հատած ադրբեջանական զինված ուժերի նկատմամբ, ՌԴ-ն կամ ՀԱՊԿ զորքերը չցուցաբերեն անհրաժեշտ աջակցություն՝ խախտելով պարտավորությունները, վարչապետի պաշտոնակատար Նիկոլ Փաշինյանն ասաց դա կնշանակի, որ այդ կազմակերպությունը կամ որևէ երկիր հայտարարի ինքնալուծարման մասին։
«Եթե ինքն իր միջազգային պարտավորությունը չի կատարում, դա ո՞նց եք հնարավոր համարում»,- ասաց Նիկոլ Փաշինյանը
Փաշինյանը նաեւ նշեց․ «ՌԴ նախագահը նաև հրապարակային հայտարարել է և ինձ հետ աշխատանքային քննարկումների ժամանակ ասել է, որ Ռուսաստանի դիրքորոշումը եղել է և մնում է այն, որ ՀՀ սահմանը կարմիր գիծ է ՌԴ համար։ Եվ, այո, ցավալի փաստ է, որ Ադրբեջանն այդ կարմիր գիծը հատել է։ Եվ ես անհավանական եմ համարում, անհնարին եմ համարում, որ Ռուսաստանի Դաշնությունը իր պայմանագրային պարտավորությունները չկատարի։ Այդ պայմանագրային պարտավորությունների ամբողջ իմաստն ու մեկնաբանությունն այն է, որ հարձակումը ՀՀ վրա հարձակում է ՌԴ վրա։ Դա գրված է թղթի վրա։ Սա նշանակում է, որ եթե որևէ մեկն անպատիժ կարող է հարձակվել ՀՀ վրա, ուրեմն ցանկացած մեկը անպատիժ կարող է հարձակվել ՌԴ վրա»։
