Ճիշտ չէր լինի Հայաստանը հրաժարվեր միջազգային գործընկերներին հյուրընկալելու հնարավորությունից այն պատճառով միայն, որ կազմում կան նաեւ պատվիրակներ Ադրբեջանից: Այս մասին այօսօր լրագրողների հետ ճեպազրույցի ժամանակ ասել է «Եվրանեսթ» ԽՎ-ում Հայաստանի ԱԺ պատվիրակության ղեկավար Մարիա Կարապետյանը:
«Եվրանեսթ» ԽՎ-ում Հայաստանի ԱԺ պատվիրակության ղեկավար Մարիա Կարապետյանը մանրամասներ է հայտնել Երեւանում ընթացող Եվրանեսթ խորհրդարանական վեհաժողովի բյուրոյի եւ հանձնաժողովների նիստերի օրակարգային հարցերի, քննարկումների եւ ներկայացված դիրքորոշումների վերաբերյալ: Այս համատեքստում նա կարեւորել է հատկապես ԵԽ անդամ, Էստոնիայի ներկայացուցիչ Մարինա Կալյուրանդի դիրքորոշումը: Պատվիրակն այսօր եւս մեկ անգամ վերահաստատել է, որ պատերազմը հակամարտության լուծման միջոց չէ, եւ ԼՂ հակամարտությունը դեռեւս պետք է ստանա ամբողջական, համապարփակ եւ բանակցված խաղաղ լուծում:
Լրատվամիջոցների ներկայացուցիչները Մարինա Կարապետյանից փորձել են պարզել, թե ԽՎ-ի բյուրոյի նիստում ի՞նչ հարց է քննարկվել, հանձնաժողովների նիստերում բարձրացվե՞լ է արդյոք Ադրբեջանում գտնվող ռազմագերիների ու պահվող այլ անձանց վերադարձի հարցը, քննարկվե՞լ է արդյոք ԼՂ հակամարտության կարգավորման խնդիրը, անդրադարձ եղե՞լ է Ուկրաինայում տիրող իրավիճակին:
Մարիա Կարապետյանը տեղեկացրել է, որ Քաղաքական հարցերի, մարդու իրավունքների եւ ժողովրդավարության ու Էներգետիկ անվտանգության հարցերի հանձնաժողովների նիստի օրակարգում ներառվել է Հարավային Կովկասի անվտանգությանը վերաբերող թեման, որի շրջանակում քննարկվել է ԼՂ հակամարտության կարգավորման հարցը: Հայկական պատվիրակության ղեկավարը հակամարտության վերջնական խաղաղ լուծման հասնելու վերաբերյալ շեշտադրումներ է արել, Եվրոպական խորհրդարանի գործընկերներն իրենց աջակցությունն են հայտնել այդ օրակարգին: Նշվել է, որ առանձին բանաձեւի կամ նախագծի ընդունում նիստի ձեւաչափը չի նախատեսում:
Կառավարող եւ ընդդիմադիր խմբակցությունների ներկայացուցիչները խոսել են հումանիտար հարցերի, մասնավորապես ռազմագերիների եւ պահվող այլ անձանց անհապաղ վերադարձի անհրաժեշտության մասին: Իսկ ադրբեջանցի պատվիրակներն ինչպե՞ս են արձագանքել դրան` հարցին ի պատասխան` Մարիա Կարապետյանը նշել է, որ վերջիններս տարանջատում են պատերազմի ժամանակ եւ պատերազմից հետո գերության մեջ ընկած անձանց: Նրա խոսքով` հումանիտար իրավունքը նման տարանջատում չի ճանաչում: Եւ գերիների ու պահվող անձանց վերադարձի վերաբերյալ եռակողմ ստորագրված փաստաթուղթը, եւ միջազգային հումանիտար իրավունքը պահանջում են բոլոր անձանց վերադարձ` անկախ նրանց գերության մեջ ընկնելու ժամկետներից:
Անդրադարձ է եղել նախօրեին կայացած Բյուրոյի նիստին: Մարիա Կարապետյանը տեղեկացրել է, որ ընդունված հայտարարությանն ինքը կողմ չի քվեարկել: Հայտարարության բովանդակությունն այսօր կխմբագրվի Բյուրոյի շահագրգիռ անդամների կողմից եւ կհրապարակվի: «Հարավային Կովկասում անվտանգությունն ու խաղաղությունն իմ պատասխանատվությունն ու առաջնահերթությունն է: Դա է եղել իմ մղումների եւ քվեարկության հիմքում»,-ասել է պատգամավորը:
Անդրադառնալով խաղաղ զարգացման դարաշրջան բացելու վերաբերյալ հայտարարություններին` Մարիա Կարապետյանը նշել է, որ արդեն տեւական ժամանակ է Հայաստանը խոսում է Հայաստանի եւ Հարավային Կովկասի տարածաշրջանի համար խաղաղ զարգացման դարաշրջան բացելու մասին, ինչի վերաբերյալ պարբերաբար ուղերձներ լսում ենք նաեւ Ադրբեջանի նախագահ Իլհամ Ալիեւից: «Սակայն, կարեւոր է շեշտել, որ գործողությունները եւ խոսքերը պետք է համապատասխանեն»: Նա հավելել է, որ մեր եւ միջազգային հանրության պատկերացումն այն է, որ ԵԱՀԿ Մինսկի խմբի համանախագահությունն է այն ձեւաչափը, որտեղ խաղաղության համաձայնագիրը կարող է քննարկվել` միանշանակ կողմ լինելով Հարավային Կովկասում խաղաղությանը եւ կայունությանը:
Խոսելով Ուկրաինայի շուրջ ստեղծված իրավիճակից` Մարիա Կարապետյանը շեշտել է. «Հույս ունեմ, որ խաղաղությունը կպահպանվի, երկխոսության միջոցով հնարավոր կլինի թոթափել լարվածությունը»:
