Թուրքիայի նախագահ Ռեջեփ Թայիփ Էրդողանը հոկտեմբերի 6-ին Պրահայում եվրոպական քաղաքական հանրության գագաթնաժողովի շրջանակում կարող է հանդիպել ՀՀ վարչապետ Նիկոլ Փաշինյանի հետ: Այս մասին հայտնում է թուրքական Sabah թերթը՝ վկայակոչելով իր աղբյուրները։ Էրդողանը, հոկտեմբերի 1-ին ելույթ ունենալով խորհրդարանում, հայտնել է նման հանդիպման հնարավորության մասին։
Բանակցություններում, նշում է Sabah-ի, նախատեսվում է քննարկել Թուրքիայի և Հայաստանի հարաբերությունների կարգավորումը: Մասնավորապես, ինչպես սպասվում է, Էրդողանը Փաշինյանին կառաջարկի երկկողմ հարաբերությունների կարգավորման հարցերով հատուկ ներկայացուցիչների հանդիպումները հաջորդաբար անցկացնել Թուրքիայում և Հայաստանում, այլ ոչ թե երրորդ երկրների տարածքում: Բացի այդ, Թուրքիայի նախագահը հանդես կգա տարածաշրջանում լարվածության թուլացման և Հայաստանի ու Ադրբեջանի միջև խաղաղության պայմանագրի շուտափույթ ստորագրման առաջարկներով։
