ԱԳ նախարար Արարատ Միրզոյանը չի մեկնաբանել Թուրքիայի նախագահ Ռեջեփ Թայիփ Էրդողանի հայտարարությունները, թե «Զանգեզուրի միջանցքի հարցում խնդիրը ոչ թե Հայաստանից է գալիս, այլ՝ Իրանից»։
Նախարարը խոսել է տարածաշրջանային ենթակառուցվածքների ապաշրջափակման մասին՝ շեշտելով, որ սա լավ հնարավորություն է՝ ևս մեկ անգամ վերահաստատելու Հայաստանի դիրքորոշումը. «ՀՀ-ն մեծապես շահագրգռված է տարածաշրջանում տրանսպորտային, տնտեսական ենթակառուցվածքների ապաշրջափակմամբ։ Ակնհայտ է, որ այդ ենթակառուցվածքները պետք է ապաշրջափակվեն մի քանի հայտնի սկզբունքների հիման վրա․ օրինակ, այն երկրների ինքնիշխանության ներքո պետք է գործեն, որոնց տարածքով անցնում են, այդ ենթակառուցվածքները պետք է գտնվեն այն երկրների իրավազորության ներքո, որոնց տարածքով անցնում են, և այդ ենթակառուցվածքները պետք է բացվեն հավասարության և փոխադարձության սկզբունքի հիման վրա»,- ասել է նա։
Միրզոյանի խոսքով՝ վարչապետ Փաշինյանի և փոխվարչապետ Մհեր Գրիգորյանի մասնակցությամբ ինտենսիվ հանդիպումներ են ընթանում, այս հարցերը քննարկվում են. «Իմ տպավորությունն այն է, որ որոշակի առաջընթաց կա, հատկապես՝ պարոն Գրիգորյանի վերջին հանդիպումների շրջանակներում։ Բայց վերջնական արդյունք դեռ չունենք, առայժմ դրանց բացակայության պատճառը չենք կարող հանրայնացնել»։
