«Կառավարությունը չպիտի միջամտի եկեղեցու գործերին»,- այս մասին այսօր ասուլիսի ժամանակ հայտարարել է ՀՀ վարչապետ Նիկոլ Փաշինյանը՝ արձագանքելով հարցին, թե Բագրատ արքեպիսկոպոս Գալստանյանը հայտարարել է, որ գործում են Վեհափառ Հայրապետի օրհնությամբ։
«Հարաբերությունների նման ճգնաժամի պարագայում Գարեգին Բ-ն որքանո՞վ կարող է ներկայացնել հայ ժողովրդին կամ սպասարկել նրա հոգևոր շահերը և իրադրության նմա զարգացման պարագայում պե՞տք է կրի պատասխանատվություն»,- նշել է վարչապետը:
«Թե ինչ տեղի կունենա, ես այդ հարցերը չեմ մեկնաբանի, որովհետև ի վերջո Հայ առաքելական եկեղեցին ունի գործունեության իր կանոնները: Բայց ընդհանուր առմամբ ակնհայտ է, որ Ամենայն Հայոց կաթողիկոսն այսօր Հայաստանում առաջնորդում է քաղաքական շարժում, և այդ շարժման նպատակը՝ ինչպես իրենք են ձևակերպում նախորդ իշխանությանը իշխանության բերելն է: Այս սցենարը ներկայացվել էր դեռևս 2021 թվականի ընտրություններից հետո՝ «Հայաստան» դաշինքի ղեկավարն էր այդ սցենարը ներկայացրել, թե ոնց պետք է եկեղեցու միջոցով իրականացնել իշխանափոխություն: Ամենայն Հայոց կաթողիկոսի կողմից առաջնորդվող շարժումը, այսինքն՝ ինչ է նշանակում օրհնել, նշանակում է առաջնորդել, որովհետև հոգևորականը չի կարող առանց Ամենայն հայոց կաթողիկոսի թույլտվության, նույնիսկ հանձնարարության քաղաքական տեքստ ասել: Ակնհայտ է, որ այս գործընթացի առաջնորդն Ամենայն Հայոց կաթողիկոսն է, իսկ թիվ մեկ շահառուն «Հայաստան» դաշինքի ղեկավար Ռոբերտ Քոչարյանը, և դա ապացուցված փաստ է»,- նշեց վարչապետը: