82 ամյա Նենսի Փելոսին մեր տարածաշրջանը գրավեց ոչ միայն երիտասարդ արտաքինով, այլև քաղաքական արշավով: ԱՄՆ Ներկայացուցիչների պալատի խոսնակն ԱՄՆ առաջին բարձրաստիճան պաշտոնյան է, որը պաշտոնական այցով եկավ Հայաստան՝ Խորհրդային միությունից անկախություն ձեռք բերելուց հետո։
ԱՄՆ Ներկայացուցիչների պալատի խոսնակը Երևանում հայտարարեց՝ իր այցը նշանակալից է «հայկական տարածքի վրա Ադրբեջանի կողմից անօրինական և մահաբեր հարձակման ժամանակաշրջանում, իսկ հետո դատապարտեց հարձակումը Հայաստանի ինքնիշխանության վրա։
Փելոսիի այցը Հայաստան կայացավ աշխարհաքաղաքական ծանր և խառը ժամանակաշրջանում: Խառն էր ոչ միայն աշխարհը, այլև Հայաստանը: Նենսի Փելոսին Հայաստան ժամանեց այն ժամանակ, երբ դեռ չէր անցել ադրբեջանական զենքի վառոդի հոտը, երբ արդեն ակնհայտ էր թուրք-ադրբեջանական հարձակման նպատակը, երբ Հայաստանն առանց դաշնակիցների մնաց թշնամու դեմ: Թեպետ առաջին հայացքից աշխարհը սևեռված է ռուս-ուկրաինական պատերազմի վրա, սակայն աշխարհակարգի փոփոխության համար մղվող պայքարի մյուս օջախը Հայաստանն է, փոքրիկ երկիր, որը դարձել է մեծ խաղասեղան աշխարհակարգը բաժանողների համար:
Նենսի Փելոսիի Երեևանյան ուղերձները որքան համեստ էին, նույնքան թիրախային: Փելոսին խոսեց Հայաստանի տարածքային ամբողջականության խախտման անթույլատրելիության, Հայաստանի ժողովրդավարության, ինքնիշխանության, և անվտանգության պաշտպանության կարևորության մասին:
Նենսի Փելոսին այցելել է նաև Հայաստանի պաշտպանության նախարարություն: Սուրեն Պապիկյանը նրան է ներկայացրել ադրբեջանական լայնածավալ ռազմական ագրեսիայի հետևանքով ստեղծված իրադրությունը, իսկ Փելոսին այդ իրավիճակի վերաբերյալ ԱՄՆ դիրքորոշումը: Հանդիպման ընթացքում քննարկվել են նաև պաշտպանական ոլորտում երկու երկրների գործակցությանն առնչվող հարցեր:
Սրանք այն տեղեկություններ էին, որոնք բաց էին հանրության և լրատվամիջոցների համար, բնականար ամերիկացի պաշտոնյայի այցը կունենա նաև փակ ուղերձներ՝ Հայաստանի իշխանությանը, ինչու չէ նաև տարածաշրջանի զարգացումներով հետաքրքրված մյուս երկրներին:
Հայ-ադրբեջանական սահմանին հրադադարն առայժմ պահպանվում է: Փելոսիի այցի օրերին Բաքուն հայտարարեց ռազմական գործողությունների ավարտի մասին, Անկարան այս հարցում աջակցեց Ադրբեջանին: Հայաստանում ակտիվացան ՀԱՊԿ-ից դուրս գալու պահանջները, իսկ Կրեմլը՝ խանդով արձագանքեց Փելոսիի այցին:
Դմիրտրի Պեսկով. «Այն ամենը, ինչը ոչ թե խոսքով է, այլ գործով՝ հանգիստ և գործնական, կարող է նպաստել հարաբերությունների կարգավորմանը, սահմանին իրավիճակի կայունացմանը, այս ամենը կարելի է ողջունել։ Ժամանակի ընթացքում ամեն ինչ պարզ կդառնա»
Նենսի Փելոսիի օդանավն այսօր լքեց Զվարթնոցը՝ իր հետ տանելով ոչ միայն ամերիկյան քաղաքականության հենասյուներից մեկին, այլև գուցե հին աշխարհակարգը փլուզելու և նորը կառուցելու հայկական գործիքները: