ԱԺ ՔՊ խմբակցության քարտուղար Արթուր Հովհաննիսյանն անդրադարձել է ՀՀ զինանշանի հետ կապված վարչապետ Նիկոլ Փաշինյանի երեկվա հայտարարություններին, թե այն 1991թ հիմնված ՀՀ հետ կապ չունի։
Հովհաննիսյանը վստահեցրել է, որ իշխանությունն այն փոխելու որոշում չունի.
«Եթե նկատեցիք վարչապետը երեկ իր այդ մտքերն արտահայտելուց առաջ ասաց, որ կիսվում է մտքերով և բոլորս, ըստ էության, կարող ենք միանալ այդ քննարկումներին։ Իշխանությունը որպես այդպիսին, որոշում չունի որևէ նախաձեռնությամբ հանդես գալու, վարչապետը բացել է խոսակցություն, բոլորդ կարող եք միանալ այդ խոսակցությանը»,- ասաց Հովհաննիսյանը։
ՔՊ խմբակցության պատգամավոր Բաբկեն Թունյանն էլ նշել է. «Հիմա, եթե ասենք՝ այո հնարավոր է որևէ նախաձեռնություն, կստացվի, որ այդ թեմայով քննարկում ենք անում, եթե ասենք՝ հնարավոր չէ, կստացվի այդ թեման փակ է։ Դա կարծիք կիսելու փորձ էր ու այդ քննարկումն արդեն դուք սկսել եք հիմա»։