ՏԱՍՍ գործակալության փոխանցմամբ Իրանի հետ բանակցությունների հետաձգման յուրաքանչյուր օր Թեհրանին մոտեցնում է միջուկային զենքի մշակմանը, և Իսրայելն իրեն իրավունք է վերապահում ցանկացած պահի ցանկացած միջոց գործի դնել՝ դա կանխելու համար: Այս մասին հայտարարել է Իսրայելի ԱԳ նախարար Յաիր Լապիդը՝ Վաշինգտոնում ԱՄՆ պետքարտուղարի եւ ԱՄԷ ԱԳ նախարարի հետ համատեղ ասուլիսի ժամանակ։
«Ամեն անցնող օր, ցանկացած հետաձգում և բանակցությունների ձգձգումն Իրանին մոտեցնում է միջուկային ռումբին: Եթե ահաբեկչական ռեժիմը միջուկային զենք ստանա, մենք պետք է գործենք: Իսրայելն իրեն իրավունք է վերապահում գործելու ցանկացած պահի և ցանկացած միջոցով, որը ոչ միայն մեր իրավունքն է, այլև մեր պատասխանատվությունը»,- ասել է Իսրայելի ԱԳ նախարարը։