Իրաքի վարչապետ Մուստաֆա ալ-Քազիմին հայտարարել է, որ կլքի իր պաշտոնը, եթե երկրում քաղաքական իրավիճակը վատթարանա։ Այս մասին երեքշաբթի հայտնել է Al-Hadath հեռուստաալիքը։
«Եթե քաղաքական իրավիճակը վատթարանա, ես ժամանակին կհայտարարեմ իմ հրաժարականի մասին Իրաքի վարչապետի պաշտոնից», – ասել է ալ-Քազիմին իրաքցի ժողովրդին ուղղված ուղերձում։ Նրա խոսքով, եթե երկրում շարունակվեն հակամարտություններն ու քաոսը, ինքը կկատարի իր բարոյական ընտրությունը եւ այդ որոշումը կկայացնի երկրի սահմանադրությանը համապատասխան։
Ալ-Քազիմին ասել է նաեւ, որ կառավարությունը հատուկ կոմիտե է ստեղծել՝ Բաղդադում վերջին բախումները հետաքննելու եւ «իրաքցիների արյուն թափածներին եւ կառավարական շենքերի վրա հրթիռներ արձակողներին բացահայտելու համար»։ Նա վերահաստատեց իր համոզմունքը, որ զենքը պետք է լինի բացառապես պետության վերահսկողության ներքո։