Օրերս Հայկական պետական մանկավարժական համալսարանի կուլտուրայի ֆակուլտետի դահլիճում տեղի ունեցավ հերոսների հիշատակին նվիրված` «Ձեռքդ դիր սրտիդ, ես այդտեղ եմ» գրքի շնորհանդեսը։ Գրքի հեղինակը ՀՊՄՀ-ի ուսանողուհի Ռուզաննա Մարգարյանն է։ Շնորհանդեսին ներկա էին պատերազմի մասնակիցներ, զոհվածների հարազատներ, ուսանողներ և դասախոսներ։ Շնորհանդեսը սկսվեց հուզիչ կատարմամբ` ի հիշատակ զոհված տղերքի, որին հաջորդեց հեղինակի ելույթը։
«Հայի ճակատին հավերժ փորագրվեց է պայքարը։ Պայքարել ամեն ինչի դեմ՝ ցավի, տառապանքի, նույնիսկ ինքներս մեր դեմ: Պայքարել ու երբեք չհանձնվել, այս է մեր խորագիրը»,- նշեց Ռուզաննա Մարգարյանը։
Ռուզաննա Մարգարյանը պատերազմից հետո սկսել է շատ անսպասելի գրել՝ թղթին հանձնելով իր ապրումներն ու զգացողությունները, ինչպես նաև մերօրյա հերոսների մասին պատմությունները , որոնք նա գրի է առել ծնողների, ընտանիքի անդամների հետ հանդիպումների ժամանակ։
Գրքի շապիկի պատկերը, ինչպես հեղինակը նշեց, պատահական չէր ընտրված։ Երեք ձեռքերը խորհրդանշում են՝ խաչը, սուրբ հոգին և հավատը։
Իրենց ոգևորող խոսքով հանդես եկան պատերազմին մասնակից տղաները։ Իսկ շնորհանդեսի վերջում հեղինակը գրքեր նվիրեց զոհված զինվորների հարազատներին։
Հեղինակ ՀՊՄՀ լրագրության բաժնի ուսանողուհի Լիլիթ Պետրոսյան