ՀՀ վաստակավոր նկարիչ Վլադիմիր Աբրահամյանի ընտանիքի նախաձեռնությամբ, նկարչի ծննդյան 80-ամյակի առիթով՝ նոյեմբերի 16-ին, ժամը 13:00-ին, Հայաստանի նկարիչների միությունում կբացվի ՀՀ վաստակավոր նկարիչ Վլադիմիր Աբրահամյանի ստեղծագործությունների հոբելյանական ցուցահանդեսը:
Ներկայացված կլինեն նկարչի բոլոր ժամանակների ստեղծագործությունները՝ ժանրային բազմազանությամբ ու հարուստ ներկապնակով (50-60 կտավ, այդ թվում՝ մեծածավալ):
Հոբելյանական ցուցահանդեսին առաջին անգամ ընդգրկուն կներկայացվեն Վլադիմիր Աբրահամյանի նկարազարդած գրքերը և էսքիզները: Նկարիչը 250-ից ավելի գրքի գեղարվեստական ձևավորման հեղինակ է:
Երկու օր՝ նոյեմբերի 18-ին և 20-ին նկարչի ուսանողները բացառիկ հնարավորություն կունենան նկարելու իրենց վարպետի մոլբերտի վրա, վարպետի վրձիններով: