Իմ անկեղծ մղումն է ամեն հնարավորն անել Ադրբեջանի հետ հնարավորինս շուտ խաղաղության պայմանագիր կնքելու համար։ ՀՀ Կառավարության ծրագրի 2022 թվականի կատարման ընթացքի և արդյունքների մասին զեկույցը՝ ԱԺ-ում ներկայացնելու ժամանակ հայտարարեց ՀՀ վարչապետ Նիկոլ Փաշինյանը։
«Արդյոք հնարավո՞ր է նման զարգացում, կարծում եմ՝ իսկապես հնարավոր է, բայց դրա համար անհրաժեշտ է առերեսվել մի շարք խնդիրների հետ։ ՀՀ-ի և Ադրբեջանի միջև խաղաղության պայմանագիրն իրատեսական կդառնա, եթե երկու երկրները հստակ, առանց երկիմաստությունների և որոգայթների ճանաչեն միմյանց տարածքային ամբողջականությունը և պարտավորվեն այսօր և երբեք միմյանց տարածքային պահանջներ չներկայացնել» ,- ասաց Փաշինյանը։
Վարչապետը նշեց, որ Ադրբեջանի նախագահի հետ այս մասին պայմանավորվել են 2022-ի հոկտեմբերի 6-ին Պրահայում և հոկտեմբերի 31-ին Սոչիում, ինչն արձանագրվել է համապատասխան հրապարակային հայտարարություններով։
«Այսուհանդերձ, թե՛ Երևանից, թե՛ Բաքվից հնչում են պաշտոնական հայտարարություններ, որոնցով դիմացի կողմը մեղադրվում է պայմանավորվածությունները չպահելու մեջ։ Ուզում եմ վերահաստատել, որ ՀՀ-ն լիարժեք ճանաչում է Ադրբեջանի տարածքային ամբողջականությունը և ակնկալում ենք, որ Ադրբեջանը նույնը կանի Հայկական ԽՍՀ ամբողջ տարածք ճանաչելով որպես ՀՀ։ Ադրբեջանի այն պնդումները, թե խաղաղության պայմանագրի բանակցությունների ընթացքում ՀՀ-ն հրաժարվել է կամ հրաժարվում է Ադրբեջանի տարածքային ամբողջականությունը ճանաչել՝ իրականությանը չի համապատասխանում, ինքներս ենք առաջարկել, որ պայմանագրին կցվեն հայկական և ադրբեջանական ԽՍՀ-ների՝ ԽՍՀՄ կողմից պատրաստված և հաստատված քարտեզները՝ որպես երկու երկրների տարածքային ամբողջականության հիմք»,- հայտարարեց վարչապետը։