Խոսելով Հայաստան-Թուրքիա հարաբերությունների մասին՝ պիտի արձանագրեմ, որ մեր երկրների միջև բնականոն հարաբերություններ հաստատելու մեծ հնարավորություն կա։ ԱԺ արտահերթ նիստում հայտարարեց վարչապետ Նիկոլ Փաշինյանը:
«Այդ հնարավորությունը պիտի խոստովանեմ՝ մեծացել է վերքաղաքական, վերդիվանագիտական գործոնների, ավելի ճիշտ մարդկային արժեքների շնորհիվ, այն բանից հետո, երբ մենք որոշեցինք մարդկային, հարևանային արժեքների վրա հիմնված տրամաբանությամբ արձագանքել Թուրքիայում այս տարվա սկզբին տեղի ունեցած աղետալի երկրաշարժին և Թուրքիայի Կառավարությունն ու հանրությունը մեր գործողությունները հենց ճիշտ այդպես էլ ընկալեցին և ընդունեցին»,-ասաց վարչապետը։
Վարչապետի խոսքով՝ Թուրքիա փրկարարական ջոկատ և հումանիտար օգնություն ուղարկելու որոշում չէին կայացնի, եթե չփոխեին պատմությունն ու դրանից բխող խնդիրներն ընկալելու դիտանկյունն այս ժամանակահատվածում։
«Թուրքիան Մարգարայի կամուրջը մեր բեռների և փրկարարների համար չէր բացի, եթե չհավատար մեր անկեղծությանը: Արտգործնախարար Միրզոյանի Անկարա կատարած այցի շրջանակներում Թուրքիայի ԱԳ նախարարության դիմաց ծածանվող Հայաստանի Հանրապետության տասնյակ դրոշները միայն արարողակարգային ատրիբուտ չեն, այլ մի զարմանալի արձանագրում, որ հույսը կարող է ծագել այնտեղ, որտեղ տիրում է հուսահատությունը: ՀՀ և Թուրքիայի դրոշները վեր խոյացան մեր հարաբերությունների և աղետալի երկրաշարժի բերած ավերակների վրա և ես հույս ունեմ, որ առաջիկայում Հայաստան-Թուրքիա սահմանն իրոք կբացվի և հիմք կստեղծի հարևանային բնականոն հարաբերությունների զարգացման համար: Այս առումով չափազանց կարևոր է, որ առաջիկա ամիսներին երրորդ երկրների քաղաքացիների և դիվանագիտական անձնագիր կրողների համար սահմանը բացելու պայմանավորվածությունը կյանքի կոչվի: Իհարկե, դա կարող է նաև տեղի չունենալ, եթե հումանիտար և հարևանային արժեքների բերած նոր ընկալումները ժամանակի ընթացքում սառեն, խամրեն և քաղաքական, դիվանագիտական որոշումների վրա նրանց ազդեցությունն ի չիք դառնա: Հույս ունեմ՝ նման բան տեղի չի ունենա»,-հայտարարեց Փաշինյանը։
