Հանրահայտ ռոք երգերը՝ երևանյան բեմում: Կարեն Դեմիրճյանի անվան մարզահամերգային համալիրում կայացավ «Սիմֆոնիկ ռոք» համերգային ծրագիրը, որի ընթացքում Հայաստանի պետական սիմֆոնիկ նվագախումբը կատարեց սիրված ռոք երգերը՝ դասական հնչողությամբ:
Համերգը սպասված էր հանրության կողմից. դա էր փաստում ներկաների արձագանքը. հանդիսատեսի շարքում էին ոչ միայն հայ, այլև այլազգի ունկնդիրներ: Դահլիճում ներկա էին և՛ ռոքի, և՛ դասական երաժշտության սիրահարներ:
Իհարկե, ռոքի ու սիմֆոնիկի միաձուլումը միջազգային երգարվեստում նորություն չէ, սակայն Հայաստանի պետական սիմֆոնիկ նվագախումբը այն կատարում է փայլուն՝ միջազգային բեմերին հարիր մատուցմամբ:
Համերգին հնչեցին համաշխարհային ռոք խմբեր «System Of A Down -ի «Aerials», «Nirvana»-ի «Smells Like Teen Spirit», Bob Dylan-ի «Knockin’ on Heaven’s Door», «Deep Purple»-ի «Smoke on the Water», «Metallica»-ի «No Leaf Clover», «Aerosmith»-ի «Crazy», «The Beatles»-ի «Come Together», «Scorpions»-ի «Wind of Change», «Led Zeppelin»-ի «Kashmir», «Queen»-ի «We Are the Champions» հայտնի հիթերը:
Մենակատարը կիթառահար Վարդան Գաբոյանն էր: Համերգը ղեկավարում էր դիրիժոր Հարություն Արզումանյանը, ով մեզ հետ զրույցում նշեց, որ 2022-ի հունիսին նույն համերգային ծրագրի հաջողությունից հետո որոշել են այս տարի եւս կրկնել. «Երկու տարի առաջ որոշվեց բոլոր հնարավոր հայտնի ռոք հիթերը մշակել:
Փորձերի ժամանակ գիտակցեցինք, որ բավականին դժվար է սիմֆոնիկի ու ռոք գործիքների բալանսը գտնել: Մեծ մասամբ մշակումներն արել են կոմպոզիտորներ Մարտին Ուլիխանյանն ու Կարեն Անանյանը: Այս հիթերը, կարծում եմ, համաշխարհային երաժշտության ոսկե ձայնադարանում են»։
Համերգի ավարտին հոտնկայս հնչող բուռն ծափահարություններով հանդիսականները Հայաստանի պետական սիմֆոնիկ նվագախմբին չորս-հինգ անգամ բեմ վերադարձրին «բիս»-ի՝ կրկին կատարելու ծրագրում ընդգրկված ստեղծագործությունները։
Հեղինակ՝ Ալինա Ստեփանյան