Ալիևի վերջին հայտարարությունները ոչնչով չեն տարբերվում Հիտլերի հայտարարություններից, որն ասում էր, թե պատմականորեն հողերն իրենց են պատկանում և հարձակվում էր հարևան պետությունների վրա։
Այս մասին Առաջին ալիքի եթերում՝ Պետրոս Ղազարյանի հետ հարցազրույցի ժամանակ ասել է ՀՀ ԱԽ քարտուղար Արմեն Գրիգորյանը:
Նա նաև նշել է, որ Հայաստանը ճնշումներ նաև միութենական պետության մասով է ստանում, ըստ նրա՝ ՀՀ ժողովրդավարությունը դիմադրում է և ստանում ռազմական տեսքով ճնշումներ:
«Միութենական պետությունը ամբողջովին սուվերենության խախտումն է։ Հայաստանի օրակարգում միութենական պետության մեջ մտնելու օրակարգ չկա։ Հայաստանում ընթացող ժողովրդավարական գործընթացները սահմանափակում են այդ հարցը քննարկելու հնարավորությունը։
Հայկական կողմը միշտ էլ կառուցողական է եղել, նաև պատերազմից հետո, ամբողջ 2 տարվա ընթացքում։
Երևանը որևէ քայլ չի արել, որ ՀՀ և ՌԴ միջև դիվանագիտական ճգնաժամ ստեղծվի։ Հայկական կողմն ակնկալում է, որ Լաչինի միջանցքը հնարավորինս արագ կբացվի։ Ամբողջ միջանցքը ռուս խաղաղապահների պատասխանատվության տակ է»,-ասել է ԱԽ քարտուղարը։
Նա հավելել է, որ այժմ ստեղծված ճգնաժամի պատասխանատուն Ադրբեջանն է, այն լուծելու հնարավորություն ունի ՌԴ-ն, որովհետև նա լիազորված է դա անել նոյեմբերի 9-ի հայտարարության համաձայն։ Ախ քարտուղարի խոսքով՝ «Ադրբեջանն այս քայլով ուզում է քանդել նոյեմբերի 9-ի ճարտարապետությունը, դա պիտի մտահոգի ՌԴ-ին»։
«Այդ քայլերը լայն կոնտեքստ ունեն, Ադրբեջանին աջակցելու, ՀՀ տարածքում այսպես կոչված միջանցք ստանալուն աջակցելու կոնտեքստում է, ՀՀ-ն դիմադրում է դրան։ Ճգնաժամի դրդապատճառը սա է։
ՌԴ հետ հարաբերությունները պայմանագրային են, մենք շարունակելու ենք քայլեր ակնկալել, բայց եթե չլինեն այդ քայլերը, հարցեր կառաջանան, թե ինչու։
Լաչինում առկա ճնշումը ՀՀ տարածքում արտատարածքային միջանցք ստանալու համար է։ Այս պահին ճգնաժամը լուծելու ՀՀ բոլոր գործիքները դիվանագիտական են»,-ասել է ԱԽ քարտուղարը։