Ֆրանսիայի նախագահ Էմանուել Մակրոնը Ռուսաստանին մեղադրել է Հայաստանի և Ադրբեջանի միջև վերջին բախումները միտումնավոր հրահրելու մեջ՝ որպես Կովկասի տարածաշրջանում և դրանից դուրս ապակայունացման ջանքերի մաս։
Չորեքշաբթի France 2 հեռուստատեսության հետ զրույցում Մակրոնն ասել է, որ Մոսկվան վերջին ամիսներին լարվածություն է բորբոքել հօգուտ Ադրբեջանի։
«Այն, ինչ կատարվում էր սահմանին վերջին երկու տարիներին… 5000 ռուս զինվոր այնտեղ են, որպեսզի իբր երաշխավորեն սահմանը, (բայց) ռուսներն օգտագործեցին դարավոր այս հակամարտությունը և խաղացին Ադրբեջանի՝ թուրքական մեղսակցությամբ խաղը և վերադարձան թուլացնելու Հայաստանը, որը ժամանակին իրենց մերձավոր երկիր էր։ Տեսնու՞մ եք՝ ինչ է կատարվում։ Դա Ռուսաստանի կողմից ապակայունացման փորձ է։ Նա ցանկանում է անկայունություն ստեղծել Կովկասում՝ մեզ բոլորիս ապակայունացնելու համար»,- ասել է Մակրոնը:
Ֆրանսիայի նախագահի խոսքով՝ Ֆրանսիան առանձնահատուկ կապեր ունի Հայաստանի հետ, որովհետև Հայաստանը միշտ պայքարել է տարածաշրջանում հանդուրժողականության և խաղաղության համար:
«Երկու տարի առաջ Լեռնային Ղարաբաղում պատերազմ սկսվեց. դա միջազգայնորեն չճանաչված և վիճելի տարածք է։ Ադրբեջանը սարսափելի պատերազմ սանձազերծեց՝ բազմաթիվ զոհերով, սարսափելի տեսարաններով, և գրավեց այդ տարածքը։ Այս սեպտեմբերին էլ Ադրբեջանը հարձակողական գործողություններ ձեռնարկեց Հայաստանի սահմանի երկայնքով, որ, հավանաբար, կարողանա միջանցք բացել իր տարածքի երկու հատվածի միջև։ Մենք դատապարտեցինք այդ քայլը։
Եվրոպական խորհրդի նախագահի հետ հանդիպեցինք Հայաստանի վարչապետի ու Ադրբեջանի նախագահի հետ ու որոշեցինք, որ կողմերը, նախևառաջ, պետք է պարտավորվեն ճանաչել 1991 թ. սահմանները, ինչպես նաև համաձայնեն սահմանին եվրոպական առաքելության տեղակայմանը, որը պետք է հետևի տեղում իրավիճակին, որ սահմանը չխախտվի: Ֆրանսիան այստեղ է և հանդես է գալիս որպես միջնորդ։ Մենք չենք թողնի հայերին. Ֆրանսիան ադրբեջանական գազ չի գնում, այդպիսի պայմանագիր չկա, թեև եվրոպական որոշ երկրներ ունեն այդպիսի պայմանագրեր»,- ասել է Մակրոնը։
