Սեպտեմբերի 21-ին, ժամը 17:45-ին Ճգնաժամային կառավարման ազգային կենտրոն ահազանգ է ստացվել, որ Երևանի «Սուրմալու» առևտրի կենտրոնի վնասված շինությունը մասնակի փլուզվել է։ Այս մասին տեղեկացնում է ՀՀ ԱԻՆ մամուլի խոսնակը։
Դեպքի վայր են մեկնել ԱԻՆ ՓԾ Երևան քաղաքի փրկարարական վարչության հրշեջ-փրկարարական ջոկատից մեկ մարտական հաշվարկ և Փրկարարական ուժերի վարչության հատուկ նշանակության փրկարարական աշխատանքների իրականացման կենտրոնի փրկարարական խումբը։
ԱԻՆ մամուլի խոսնակը տեղեկացրել է նաև, որ «Սուրմալու» առևտրի կենտրոնի շենքի փլուզման պատճառով 3 տուժածները հոսպիտալացվել են Էրեբունի ԲԿ։ Ներկա պահին հետազոտվում են, նախնական տվյալներով առողջական վիճակները գնահատվել է բավարար։
Իսկ առողջապահության նախարարությունն էլ տեղեկացրել է, որ «Սուրմալու»-ում կիսաքանդ պատի փլուզման հետևանքով երեք տուժածներից երկուսը շտապօգնության մեքենայով, իսկ երրորդը անձնական տրանսպորտով դիմել են բժշկական կենտրոններից մեկը։
Նրանք նախնական բուժզննության փուլում են, ունեն սալջարդեր ու քերծվածքներ: