ԿԳՄՍ նախարարությունը տրամադրված չէ դպրոցներում ևս մեկ շաբաթով երկարաձգել արձակուրդը։ Այս մասին լրագրողներին հայտնել է ԿԳՄՍ նախարար Վահրամ Դումանյանը։
«Դպրոցներում արձակուրդները երկարաձգվել են մեկ շաբաթով, և ուզում եմ ասել՝ մենք տրամադրված չենք շարունակել արձակուրդը։ Այսինքն՝ կանցնենք առկա ուսուցման տարբերակին, իհարկե, խստագույնս պահպանելով հակահամաճարակային կանոնները՝ համաձայն առողջապահության նախարարի համապատասխան հրամանի»,- ասել է նախարարը:
Ինչ վերաբերում է բուհերին, նախարարն ասաց, որ առաջարկել են մինչև ամսի 15-ը ձեռնպահ մնալ առկա դասընթացներից, բայց ցանկություն ունեն 15-ից կրկին անցնել առկա ուսուցման համակարգին՝ խստորեն պահպանելով հակահամաճարակային կանոնները։
